Un rato pasa a topa mas o menos 30 ciudadano Venezolano cu ta pega na Aruba debi cu Aeropuerto ta cera y no tin vuelo disponibel pa por regresa nan pais. Pero, nan ta sigura cu e grupo di Venezolanonan pega na Aruba ta alcansa un 200 hende mas o menos. Nan keho ta cu for di nan mesun Consul no ta scucha nada y no ta dunando nan cara!
Mayoria tin nan pasashi cla mientras cu otronan a haya nan forsa pa cumpra un pasashi nobo, cu promesa cu nan lo por regresa nan pais y te awe nada di e vuelo. Na mas di un ocasion a organisa e vuelo y ora yega Aeropuerto di Aruba ta tende cu na final Gobierno Venezolano no a aproba e vuelo. E nivel di desesperacion a cuminsa crece bou di e Venezolanonan, cu tin famia aya sperando riba nan of ta cu mucha chikito pega aki.
Ta bin acerca cu e Venezolanonan tin retonan serio di estadia, sea den e hotel unda nan ta hospeda cu ta pidiendo nan pa bandona e facilidad of apartament cu nan a hospeda pa vakantie pero cu awo a pasa e dianan caba. Mayoria di nan no tin e fondonan necesario pa por keda Aruba, pasobra ta cu vakantie nan a bin. Awo nan tin gasto pa paga, siendo cu no tin trabou y ningun otro entrada.Awe nan a vocifera cu a purba papia cu nan Consul pidiendo su intervencion. Parce cu na Venezuela mes a bisa cu tin un ke otro pega pa por saca e dos permisonan. E prome ta pa e Arubianonan pega ey por sali pa Aruba bek y e di dos ta pa e mesun vuelo cu trece Arubiano cas, por hiba e Venezolanonan bek pa Venezuela.
E decision ta mara cu mester tin facilidadnan na e Aeropuerto di Venezuela pa controla tur cu ta yega Caracas y un sistema di control pa pone tur den cuarentena, mesun cos cu lo sosode aki cu e Arubianonan cu lo regresa for di Venezuela. Tanten esey no ta cla, e cas Presidencial na Miraflores ta nenga di firma e permisonan necesario pa por realisa e vuelonan aki.
E grupo di Venezuela a sigura cu aki na Aruba a haci tur lo posibel pa brinda nan ayudo pero na final no a logra. Nan ta compronde cu tur cos ta pega na Venezuela mes. Pero, nan reto y denuncia ta cu nan mesun Consul aki ta laga nan na caya, no ta saca un man pa nan y pio ainda…no ta dunando nan cara tampoco. Ta imposibel pa nan imagina cu nan mesun Gobierno por ta laga nan benta riba caya na Aruba, sin luga di estadia y sin alimentacion. Ta un asunto insolito esaki pero cu ta sosodiendo cu nan awo.