Recientemente dos representante di Mary Joan Foundation, den persona di sra. Arabella Colina y sr. Jose Tromp a ricibi nan certificacion como instructornan capacita pa traha peluca oncologico artesanal cu cabey humano.
Den luna di juni e dos representante nan a biaha pa ciudad di Morelia, Mexico pa por a wordo certifica. Como condicion pa por a tuma parti na e curso nan mester a pasa un proceso psicologico. Durante e curso nan a traha un peluca , bou di guia di instructor nan autorisa pa duna e “train the trainer” aki. Na final di e curso, e peluca nan a wordo evalua y asina tur dos a wordo certifica riba e tecnica aki.
Mary Joan Foundation ta gradici gobierno di Mexico pa a financia e curso y haci posibel cu dos miembro di Directiva por a wordo certifica como “train the trainer”. Dr. Carlos Ramos Esquivel, – Secretario di salud di Estado di Michoacan, Presidente di e programa di Voluntariado di Morelia licenciada, sra. Patricia Tello y e Coordinador di e tayer di peluca y banco di cabei, sra. Maria Dolores Maldonado Bautista hunto cu su team pa nan dedicacion y ayudo pa haci e logro aki posibel.
E perdida di cabey durante tratamento di quimoterapia por ta traumatico pa e pashent y por bira un factor negativo pa su recuperacion.
Segun experto nan, e aspecto físico tambe ta contribui positivamente pa recuperacion di e pashent. Un peluca oncologico ta di gran apoyo pa su autoestima y bienestar emocional.
30% di e peluca oncologico artesanal ta wordo cosi na machine y 70% ta wordo traha na man. Un peluca traha di cabey humano por tin un balor entre 1000 pa 1500 dollar riba mercado. Mirando e costo aki e lo por ta un peso grandi pa mayoria pashent di Aruba y Caribe en general.
Mary Joan Foundation awor tin dos persona capacita cu lo por train nan voluntario nan, pa traha peluca. Asina e peluca oncologico artesanal lo wordo entrega gratuitamente na persona c uta sufri di e malesa di cancer. E meta di Mary Joan Foundation ta pa pone un sonrisa riba cara di e pashent nan y asina hisa nan animo y autoestima na un manera positivamente.
Na momento cu un persona wordo detecta y prome cu e bai cuminsa cu su prome tratamento di quimoterapia, si su cabey ta suficiente largo e por hasi donacion di su propio cabey y asina parti di su mesun cabey lo wordo usa pa traha su propio peluca.
E proyecto lo carga e nomber “Un peluca Un sonrisa” y lo bay consisti di diferente fase. Nos lo cuminsa cu e prome fase cu ta pa colecta cabey. Pa asina por tin suficiente cabei den e banco, pa traha peluca y tambe pa tin continuidad di e proyecto.
E deseo di Mary Joan Foundation y di Estado di Michoacan ta pa exporta e peluca nan den nos region di Caribe. Cu e experticio adkiri na dicho estado nos lo por alcansa e deseo aki.
Mary Joan Foundation kier gradici tur persona cu a deposita nan confianza caba y a haci donacion di cabey durante ultimo aña nan.
Nos kier a encurasha un y tur den nos comunidad pa nan tambe haci donacion di nan cabey pa nos proyecto “Un peluca Un sonrisa”.
Exigencia pa por haci donacion di cabey:
- Cabey mester tin un minimo di 15 cm largo
- Ora di corta e cabey pa donacion e mester ta laba
- E cabey por wordo corta na un pelukeria cu ta registra pa cu e proyecto. E pelukeria lo entrega e cabey na Mary Joan Foundation. Si corta e cabey na pelukeria cu no ta registra, e persona mes mester bin entrega e cabei na oficina di Mary Joan Foundation
Pelukeria nan cu ta desea di participa den e bunita proyecto por tuma contacto cu Mary Joan Foundation, number di telefon 588-9999 of email [email protected] . Nan lo ricibi un box pa deposita e cabey den dje.
Mary Joan Foundation ta gradici comunidad di Aruba di antemano pa nan bunita colaboracion pa cu e projecto y ta spera di por conta cu e sosten di e pelukeria nan pa realisa e bunita proyecto “Un peluca Un sonrisa”.