Hopi biaha ta papia di un deficit democratico, pero tambe tin falta di igualdad den Reino Hulandes. Na Aruba y Corsou ainda no tin posibilidad pa casamento entre dos persona di un solo sexo. Ainda Gobierno di Aruba no a dicidi si ta bay den Casacion pa esaki.
Riba e punto aki, Minister President, Mark Rutte a cuminsa na bisa cu Reino Hulandes no ta un reino colonial. E ta consisti di cuater pais cu ta igual: Hulanda, Aruba, Corsou y Sint Maarten.
Pa loke ta aplicacion di ley y finansa publico, basa riba e acuerdonan via Rijksministerraad Hulanda lo kier mantene cierto grado di supervision. E no ta hurista riba e aspecto di Statuut di Reino, pero segun Rutte, e ta kere cu e aspecto di matrimonio homosexual ta algo cu ta competencia di e islanan mes.
Mas aleu, Hulanda ta profila su mes como defensor di e derechonan di un matrimonio homosexual na nivel mundial. Durante estadia di Reina Maxima na California, el a haci un bishita tambe n ‘e Castro District, cual ta un poco straño cu awo Mark Rutte, Minister Presidente di Hulanda ta bisa cu e no tin un punto di bista, pero cu nan ta kere cu cada persona tin di religion y derecho di dicidi kico riba su orientacion sexual y su genero, cu por tin cierto grado di influencia den logra acceso na matrimonio, esey ta nan opinion. Pero nan no por impone esaki riba resto di mundo, si nan por splica otro parti di mundo con nan ta maneha esaki.
Hulanda tambe tin su contratempo, no ta asina cu e caminda tin e caminda facil pa yega na un consenso pa abortus, of pa matrimonio homosexual of e igualdad den e derechonan pa hende muhe.
Hulanda no tin e autoridad moral pa impone nan pensamento riba otro pais, Premier Mark Rutte a finalisa bisando.
