Diasabra anochi, algo pasa di 8:30pm, e tan spera Aruba Caiso & Soca Monarch Contest a ranca sali.
Na comienso tabata tin masha poco hende, pero mas den careda di anochi, e luga yena un poco mas.
Despues di un anochi largo, pero yena cu ambiente, diadomingo mainta trempan, Aruba a conoce su dos monarcanan cu lo dirigi Aruba su carnaval, musicalmente.
Resultado final ta como lo siguiente:
CAISO
- Galloway
- Easy B.
- Mighty Tattoo
- King Chicho
SOCA
- Casper
- Easy B
- Blacky
- Daddy Base
E ganado sigur a ricibi bon comentario di parti di e publico.
Un di e comentarionan cu sigur a hala atencion tabata esun di Claudius Philips, Mighy Talent, como ex- Rey di Calypso y di Roadmarch, unda cu e ta pidi e organisacion pa separa e estilonan di soca, ta mescos cu bo pone Negrito de Batey, Bilirubina y Culikitakati tur den un solo festival y saca lo miho for di dje, cual segun e legendario cantante, no ta posibel. Cada uno ta grandi den nan respectivo estilo.
E ta pidi pa trece e parti comico di e festival bek, unda cu bo por hari, unda cu e anticipacion di kico e cantante ta bin cu ne, ta forma parti di e anochi. Unda, esun cu por, ta mescla papiamento hunto cu ingles. P’e cantante, esaki ta e esencia di Caiso. El a recorda e legendario Lord Boxoe cu su ‘Basha awa bay’, ‘Haragan ta den bo cas’ y tambe ‘Gege’. Ta Boxoe tabata e prome cantante cu a mescla ingles cu papiamento den su canticanan.
Si Talent ta bisa cu, tin biaha, bo mester ta hopi cuidadoso cu loke bo ta desea.
Na final, el a desea tur e ganadonan hopi pabien..
Un pabien grandi tambe di parti Headlines Group, cas editorial di 24ora.com y TREMPAN n’e dos monarcanan.
