Awe, ariba e di dos diamars di september, a habri e di 38 aña parlamentario di Pais Aruba. En conexion cu e aña nobo aki, gobernador di Aruba actual Alfonso Boekhoudt, a tene su disertacion enfokando ariba tur e retonan cu e aña parlamentario nobo lo trece cu ne. Segun Marisol Tromp, locual a resalta den e discurso ta cu mester cumpli cu e reformanan pa drecha nos aparato gubernamental.
RAft
Segun e lider di partido MAS, awor aki nos ta den e reto caminda cu “gobierno tin cu tuma un decision pa loke ta Rijkswet”. E parlamentario ta enfatisa cu mester cumpli cu e reformanan pa drecha entre otro e aparato gubernamental, paso “mas tempo pasa, mas pueblo tin cu paga” y esaki ta algo di lamenta segun e parlamentario.
E representante ta sigui splica cu minister president Evelyn Wever-Croes na varios ocasion a firma acuerdo cu Hulanda pa implementa e RAft, pero cu diripiente su mesun fraccion den parlamento ta bin cu un mocion pa kita e RAft for di mesa. Esaki ta nifica cu tin descordia entre su mesun partido. Normalmente ta asina cu ora cu un mayoria den Parlamento ta vota contra locual cu un minister haci, e minister tin cu bay cas, segun e lider di fraccion.
Aunke cu e mocion aki por a conta cu un mayoria, e representante ta enfatisa cu “MAS ta di opinion cu e RAft mester bin pa sanea finansas publico”. Ta tempo pa decisionnan cuminsa cay. “Rekmento y strekmento di tempo” lo no yuda ningun hende, segun Lopez paso con cu bay bin ya caba e decision ta tuma.
Pa mas lesa TREMPAN.COM
