Despues di dos luna di conscientisa comunidad tocante ley y reglanan di cacho a yega e momento pa accion policial contra e personanan iresponsabel cu nan cacho.
Dialuna mainta trempan Cuerpo Policial Aruba conhuntamente cu Post Aruba N.V. a ranca sali pa controla y parti multa. Ta trata di polis uniforma, K9 Unit, polis di bario y e personal di Post Aruba N.V. Nan a forma un bon ekipo cu a bay den accion.
Diariamente personal di Post Aruba N.V. ta haya nan confronta cu e cachonan los y brabo riba caya. Conhuntamente cu polis a dirigi un accion policial den algun bario rond Aruba.
A haci diferente control den barionan di San Nicolas manera: Seroe Colorado, Fortheuvelstraat, Seroe Largoweg, Juanamorto complex, De Vyust, Esso Heights, Weg Rooi Congo, Amsterdamstraat, Arnhemstraat, Castrostraat, Vorstraat, Seroe Preto, Dirskstraat, Zeewijk, Weg Rooihundo y Weg Fontein.
A constata diferente infraccion manera: Cacho los riba caminda publico, negligencia di cacho, e cachonan peligroso tambe persona cu ta cana cu cacho riba caya sin leash. E control tabata fructifero, bintiseis (26) persona a haya multa tocante diferente infraccion di ley di cacho.
E controlnan aki lo continua den otro barionan. Nos ta haci un suplica cuida bo cacho, mantene bo mes na e ley y reglanan tocante cacho y preveni di haya un multa indesea.
E boet ta halto y lo por tin consecuencia pa bo cartera.