Diabierna cu a pasa Comision fiho di Economische Zaken en Primaire Sector tabata tin un reunion cu United Farmers cu a bin y duna un presentacion di nan vision, pero tambe a comparti cu Parlamento nan preocupacionnan. Tabata un reunion den cual sr. Stanley Brown, sr. Eduard Berben y tambe sr. Gregory Fung A Fat a comparti basta informacion cu Parlamento riba e situacion actual di nos sector primario.
No ta un secreto cu e sector primario mester di hopi mas atencion y un plan concreto pa esaki por florece y bira un productor confiabel di alimento continuo pa pueblo. Covid a siña nos cu nos no por keda depende riba importacionan so y e guera na Ukraina a corda nos riba e instabilidad di e prijs di petroleo y con esaki ta afecta nos grandemente.
Aruba mester di tin un maneho responsabel y confiabel pa nos crea Food Security, y asina cada bes mas sigura cu ora tin crisis nos tin fuentenan cu ta produci e alimento cu nos pueblo mester, na un bon prijs. Ora mi pensa riba esaki mi no ta pensa riba agricultura y cria di bestia so, sino tambe riba aqua culture y industria di pesca.
Tin varios empresanan cu ta buscando pa establece nan mes den e area di pesca y “aqua culture” y ta tempo pa nan haya nan debido atencion y ayudo pa nan por haci nan inversion pa establece nan mes. Naturalmente esaki lo genera empleo y entradanan pa pais Aruba y alaves tambe ta duna nos e seguridad di por produci nos mesun alimento den casonan di crisis.
Varios di nan a cuminsa descurasha cu e trato y tardamento pa por haya e permisonan y tereno necesario pa por cuminsa traha riba nan proyecto. Ta pa e motibo aki, como miembro di e Comision Fiho di Economische Zaken en Primaire Sector mi a haci Minister sr. Ursell Arends un cantidad di pregunta riba e preocupacionan aki. Mi lo ta pendiente su contestacionan y e posibel plan pa atende riba e situacion aki.
