Recientemente gobierno a decreta e luna di april como Luna Nacional di conscientisacion Contra Abuso di Mucha. E iniciativa excelente aki ta pa trece mas conscientisacion den nos comunidad riba e tema di abuso y abuso sexual contra nos muchanan. Den luz di esaki nos a bin ta duna informacion concreto riba e hopi logro- y cambionan den ley, maneho y accion cu Gabinete Wever-Croes a bin ta tuma pa mitiga y combati abuso sexual di mucha.
1. Cambio di ley pa subi e castigo maximo pa pedofiel. Na juni 2020 a pasa e cambionan di e ley di Strafrecht van Aruba (AB 2012 no.24) den Parlamento, pa subi e castigonan maximo di zedendelicten pa pedofielnan. A haci cambio riba 30 articulo di e ley pa subi e castigonan den tur tipo di caso cu tin di haber cu abuso sexual di mucha. Por wak e cambionan aki haci riba e documentonan cu ta acompaña e articulo aki. Di e forma aki pueblo por ta consciente cu Gabinete Wever-Croes-I y Fraccion 10 di MEP a traha duro pa haci e cambionan necesario pa subi e castigonan.
2. Ombudsman lo drenta den su funcion e aña aki. Riba Dialuna 23 di januari 2023 e ley pa establece y busca e Ombudsman a keda cla. Awor comunidad por conta pronto riba un Defensor di Pueblo y e Defensor di Muchanan. E Defensor di Mucha lo tin tur recurso na su disposicion pa haci investigacion profundo, haya cooperacion di tur departamento di gobierno, lo tin e autoridad hasta pa investiga tur caminda y hasta den gobierno. Esaki ta un logro hopi grandi pa nos pais y sigur pa nos ciudadanonan. Di e forma aki nos muchanan lo tin nan propio defensor cu lo por atende e casonan di un forma hopi rigoroso y profundo.
3. Otro solucion concreto:
- A introduci varios ley pa proteccion di muchanan: Ley di crèche, ley di proteccion di mucha y hoben, ouderenplan.
- A institui un Comision Nacional di Abuso di Menor.
4. Family Justice Center. Esaki ta un proyecto di Gobierno cual tin como meta pa atende cu casonan di abuso sexual di mucha. Un di e problemanan mas grandi pa por cera e abusadonan ta cu mester di e pruebanan di e acto. FJC tin diferente profesionalnan manera un psicologo, un recherche, dokter y rapekit disponibel pa acumula tur prueba necesario y trata e mucha afecta mesora. E instancia aki ta brinda e ayudo special aki na nos comunidad den casonan lamentabel aki. Por wak e edificio den construccion band’i Island Finance Oranjestad. Pronto esaki lo keda cla.
Gabinete Wever-Croes a sa di demostra cu e proteccion di nos muchanan ta central. E cambionan concreto y solucion duradero ta den luga awo pa atende cu e problema di abuso sexual di mucha. Ban uni nos mes na e tarea di conscientisa, traha pa preveni mas caso por sucede y protege nos muchanan mas cu nunca.
