Scirbi pa Pastor Marcel Balootje.
PREPARA BO CAS.
Ora nos ta papia di prepara bo cas , esey ta nifica cu awor cu aña a cuminsa , nos ta consagra nos Famia
na Dios, pasobra esey ta forma di pone nos famia bao di cuido di Dios.
Como mayor ta nos deber di hacie pa demostra cu nos ta confia Dios cu nos Famia.
Hopi hende tin confiansa den un bon banco, of un bon compania di aseguro, of den e mihor dokter cu por tin, pero a yega tempo pa confia den Dios Todopoderoso pa nos Famia.
David a bisa den salmo121: Mi ta halsa mi bista na e seronan for di unda mi yudansa lo bini, mi yudansa ta bini di Dios Todopoderoso kende a traha cielo y tera. David a realisa cu tur su apoyo ta bini di Dios .
Moises a bisa Señor den Exodus 32, Senjor si abo no ta bay cu nos no laga nos sali for di di aki nan.Moises a realisa cu Dios ta e mihor lider.
Josue a bisa den e buki di Josue Capitulo 24: Ami y mi cas ta sirbi Señor. Tur mayor mester di Señor.
Esaki ta ehempel di diferente cabes di cas cu a mira e necesidad di pone Dios na prome lugar den nan hogar. Hopi biaha nos no ta mira e necesidad di entrega tur cos na Dios.
Hopi hende ora bo papia cu nan, ta parce manera nan no ta compronde cu e boluntaddi Dios mester wordo haci den nan bida, y tur cos ta draai rond di nan mes y nan so.Hopi hende ta pensa si mi tin mi trabao, auto y cas mi no tin mester di nada mas, ni tampoco di ningun hende.
Pero e oracion di Nos Tata ta siña cu laga Bo Reino, y laga Bo Boluntad sosode , esey ta nifica cu e boluntad di Dios ta esencial pa nos bida.
Cana, papia y Biba den e boluntad di Dios , ta e deseo di Dios pa nos bida.
Nos no por culpa ningun hende ora cos ta stanka den nos bida, pasobra cada persona tin cu tuma su decision personal di Biba pa Dios.
E boluntad di Dios ta dirigi nos bida, nos karakter, y nos integridad.
Un persona su integridad ta depende di su bida den e boluntad di Dios, pasobra pa Dios nada no ta scondi, y den bo integridad no por nada robez sconde pasobra Dios lo sake na cla.
Nos mester prepara nos cas como un cas di oracion
Caminda henter Famia ta participa den oracion
Un cas di union caminda nos tur ta biba, pordona, y yuda otro.
Un cas di respet, caminda e Spirito di Dios tin control tur momento.
Tur esaki ta locual tur Famia mester sa pa nan bendicion y prosperidad.
Ta imposibel cu nos sconde e palabra di Dios pa abo como Mayor , sin splicabo cu abo y bo cas mester sirbi Dios, pa asina paz por Reina den bo cas.
Abo y bo Famia mester tin un Iglesia caminda boso ta ricibi cuminda Spiritual y asina boso lo biba pa Señor.
Cu abo como cabez di cas, abo tata cu Dios a pone como cabes di cas ta yama pa guia bo Famia den caminda di Dios y ta responsabel dilanti di Dios pa bo Famia.
Por ta bo tin hopi aña ta busca un solucion, y bo ta bao di stress, y depression, sin salida, sin sa con bo tin di haci, awel Hesus a bisa bin cerca tur cu ta cansa y carga y lo mi dunabo Descanso, esaki ta nifica cu Hesus ta dispuesto pa tuma bo carga , pasobra si E a muri na Cruz pa abo, E ta capaz pa sacabo for di un situacion dificil.
Pesey nos por recomenda na tur Mayor cu no laga e aña avansa , pero cuminsa awe, of mihor bisa awor prepara bo cas, consagra bo Famia na Dios, Haci Hesus cabes di bo cas, entrega bo bida na Hesus Cristo, pasobra E ta nos Salbador y nos guia.
Ta un necesidad primordial di laga Cristo Hesus dirigi bo hogar . y asina bo cas lo ta prepara pa tur cos.
E lo bira e Defensor di bo hogar y abo y bo Famia lo ta feliz.
Hopi ta busca Felicidad den cos nan material, y hopi biaha den cosnan cu totalmente for di e boluntad di Dios, y ora nan encontra decepcion nan ta bira malo.
Tur bendicion ta bini di ariba for e Trono di E Altisimo,Dios ta bendiciona y e no ta cobra nada bek.
Prepara bo cas, bo bida y bo Famia pa Dios, no keda sin hacie, pasobra bo no por yuda bo mes, solamente cu yudansa di Dios e aña aki lo ta di gran bendicion pa abo .
Confia den Señor y abo y bo cas lo ta salba, y mas cu tur cos bendiciona.
Sinceramente
Pastor
Marcel Balootje.
