2 Corintios 5 vers 19 ta bisa nos lo siguiente : Esta cu Dios den Cristo tabata reconciliando e mundo cu Su mes , sin tuma nan pica nan na cuenta y e a encarga nos cu e palabra di Reconciliacion.
Cada mayor tin e encargo di reconcilia nan cas cu Dios, pa asina paz y trankilidad y bendicion por reina den tur Hogar.
Ta algo cu ta sumamente necesario den un hogar, pasobra asina nos ta demostra cu nos ta yiu di Dios, y cu Dios ta na prome lugar den nos bida.
E palabra ta bisa nos cu Dios den Cristo tabata reconciliando e mundu cu su mes, y Juan 3 vers 16 ta recorda nos cu Dios a stima e mundo asina tanto cu e a manda cu unico yiu pa ken cu kere den dje no bay perdi, ma ricibi bida eterno, aki nan nos por mira e interes di Dios den nos ,pasobra nos tur ta creacion di Dios, pesey Dios ta interesa pa reconcilia cu nos, pa asina nos por tin Amistad cune pa nos por ta yiunan di Dios.
Den nos curazon como mayor mester tin e amor pa reconcilia cu nos yiunan, pero na prome lugar nos mes mester ta reconcilia cu Dios pa asina nos por sinti e amor di Dios pa nos bida, y nos bida lo duna testimonio na nos yiunan con bon Dios ta pa nos. y esey ta esencial pa tur Famia e reconciliacion.
Den lucas Capitulo 15 vers 11 en adelante nos ta mira e parabola di e yiu perdi, y con e tata , tabatin un curazon cu ta reconcilia , y nos tur conoce e historia kico a pasa ora e yiu a bin cas bek
E relacion entre mayor y yiu , ta unico, e amor di mayor ta bini despues di e amor di Dios, pasobra ningun hende por stima bo yiu mas cu bo mes como mayor , ningun creche , ningun fundacion, no por reemplaza e amor di mayor.
Nos mester compronde cu nos no por negocia cu nos yiunan, no por laga e mucha haci locual cu e kier, Sali manera e kier, bisti desformal sin respet, Sali riba caya y regresa ora e kier, laga amigo y amiganan keda drumi lanta manera e yiu kier, huma , bebe of droga manera e kier, no esey no ta educacion esey ta principio di destruccion.
Ta tristo ora cu nos mira con mayornan ta habri man laga bay y bisa cu mi no por mas cu e mucha ey, e ta cansami, mi ta fada, e ta haci mi bida dificil, pero nos tin di corda e mandato cu Dios a duna cada mayor den Efesios 6 vers 4.
Hopi biaha como mayor no por reconcilia cu nos yiu , pasobra nos mes nunca a duna importancia di reconcilia nos bida cu Dios, y nos a kere cu ta algo di religion sin busca drechi cu ta algo cu nos tur tin derechi riba dje cual ta nos reconciliacion cu nos Dios.
Reconciliacion cu Dios ta nifica cu Dios kier drecha cuenta cu nos, como nos tata Todopoderoso e kier nos bon, e no kier nos bay perdi,den 2 Pedro 3 vers 9 ta mustra cu Dios tin pasenshi cu nos y e kier pa nos tur yega na arepentimiento
Den Romanos 2 vers 4 e Palabra ta bisa: Of bo ta menosprecia rikesa di Su cariño , tolerancia ,pasenshi , sin sa cu e cariño di Dios ta hiba bo a arepentimiento?
Mas cu cas grandi, auto , placa, negoshi y tur placer e reconciliacion cu Dios ta mas importante cu tur cos.
E ta trece paz den nos bida, famia, hogar, nos lo mira su fruta pasobra reconciliacion ta bini directamente for di e trono di Dios.
Nos tur mester realisa cu Dios kier nos bon, y Dios kier bendiciona tur Famia, y Dios su deseo ta pa nos reconcilia cu E , acepta su yiu Cristo Hesus den nos bida como nos Señor y Salbador y asina tin e segurida di hereda bida eterna.
Awor cu nos ta drenta e delaster siman di 2020 un anja cu hopi complicacion, cual a laga un marca hopi fuerte atras , y hopi di nos a perde sernan keri.
Ban para keto un rato, y reconoce cu nos mester reconcilia nos bida cu Dios, laga nos reconcilia cu Dios y tambe pordona nos prohimo, mescos cu Dios a pordona nos, corda bon cu nos aricibi pordon gratis di Dios,Laga nos pordona otro sin impone ningun condicion. Dios a duna nos e palabra di reconciliacion pa cada bida y cada Hogar.
Pesey nos ta roga cada Famia riba nos isla sea reconcilia cu Dios.
Sinceramente,
Pastor Marcel Balootje.
