Prome Minister Evelyn Wever Croes den e conferencia di prensa di gobierno a informa cu gobierno a haya su mes obliga di introduci mas medida, necesario, debi na e cantidad di casonan activo.
Te cu dialuna tabatin 49 fayecimento y mas di 160 caso activo.
Tin motibo di preocupacion, e cantidad di casonan nobo pa dia ta aumentando. E ta un averahe di 20 caso nobo pa dia, e mesun nivel di rond di 19 di october. E averahe e luna aki ta 18, a tuma algun medida y a baha pa 12, pero awo a bolbe subi. E indicacion di awe ta cu e cantidad di casonan nobo ta rond di 40.
Banda di esaki e positivity rate di ayera tabata 30%, e mesun nivel na augustus, net prome cu e piek cu a yega na luna di september.
E di dos motibo di preocupacion ta pasobra e hendenan no ta test manera antes. Y esnan cu si ta test ta warda 4 pa 5 dia prome cu nan bay test, plamando e virus rond, sin cu e hendenan sa. Di esnan cu si ta haci e test, 80% ta haya esaki, contagia den famia. A constata cu hopi ta bini cu e virus for di afo, ora cu a bay cu vakantie.
E di tres motibo ta cu nan a constata cu no ta atene nan mes na e reglanan. E grupo aki den ultimo simannan a bira mas grandi. Den fin di siman por a mira aglomeracion y fiestanan clandestino. Lamentablemente musico y dj-nan a bira creativo causando aglomeracion, siendo a palabra nan cu esaki no por sosode.
Rond mundo dianan di fiesta ta motibo cu mas e virus por plama. Mirando cu ta yegando nivel di augustus, gobierno no kier pa yega eynan. E ta bira un menasa pa salud publico y economia di e pais. Expertonan a conseha cu pa evita e escena dramatico, mester tuma medida awo.
E medidanan ta cuminsa diaranson y ta valido te cu 3 di januari.
Ora di cierre ta bira 10’or anochi y animacion musical ta posibel solamente den restaurantnan, pero sin bailamento. Gerencia ta responsabel pa cumplimento di regla. E di tres medida, ta permiti pa tira pagara pero te 3’or di atardi. Despues di e ora ey no ta permiti pa tira pagara door di negoshinan. Na casnan residencial si por tira pagara despues di tiro.
E di cuatro ta cu lo introduci toque de queda, cuminsando mañan for di 11’or te 5’or di mainta. E unico excepcion ta cambio di aña, cu e Toque de Queda ta cuminsa 2’o di marduga pa 5or di marduga.
