Dia 20 di april 2022 Fundacion Rancho a cumpli diesdos aña di existencia. Pa algun siman caba tabatin preparacion andando den cuadro di e gran celebracion y logro aki. E fundacion ta concerni cu promocion y preservacion di e aspectonan historico y cultural di e bario di Rancho.
Den palabra di e presidente di e fundacion, Clifford Rosa, el a conta cu e tabata un dia completo yena cu actividad pa celebra e logro. A inicia e dia cu un desayuno mainta den cua a brinda oportunidad n’e boluntarionan, e miembronan di directiva, e sostenedonan y e colaboradonan pa celebra e diesdos aña di e fundacion.
Ya pa e parti di anochi a tene un brindis ameno cu algun invitado internacional di La Guajira Colombia, enfocando riba un intercambio cultural y comercial cu nan ta bezig cu ne. Den e contecto aki tabatin tambe cuater charla organisa. E prome tabata realisa pa Rosa mes, den cua el a papia tocante e historia di Oranjestad, esta e kooplieden kwartier. Fuera di esaki tabatin un discurso di e rector di Universidad di Aruba, invitado di La Guajira, Maria Isabel Cabarcas, Joyceline Croes y tambe Dandy Osorio.
Rosa a conta cu e anochi di presentacion tabata uno bunita y a manda un palabra di gradicimento na diferente instancia, entre otro, Romar Trading pa a pone e luga disponibel. A recorda tambe cu e celebracion ameno aki ta un preparacion pa celebra 200 aña di Oranjestad, pa proteha e capital como un patrimonio di herencia cultural importante pa Aruba.
Pa un relato mas amplio, lesa edicion di TREMPAN.
