Confesion no a bay fo’i moda. Confesion t’ey pa tur esunnan cu ta kere den Cristo Hesus y kier agrada Dios cu nan bida, canando asina den Su luz y haci nan relacion mas fuerte cu Señor.
Confesion ta trece sanacion.
Confesion ta trece libertad.
Confesion ta core cu hipocresia.
Confesion ta trece humildad.
Confesion ta trece reconciliacion entre Dios y hende.
E enemigo semper lo hinca den hende su cabes pa nenga, minimalisa, purba sconde of cubri nos pica, of tira falta riba otro. Hopi no ta realisa cu e enemigo kier gaña nos pa keda wanta e pica aden y sin confesa. Asina nos ta bira defensor di mentira y hipocresia y esclavo di pica y esey pocopoco ta causa nos caida y aleha nos fo’i Dios. Pero Cristo Hesus a muri pa nos picanan rib’e cruz na Calvario. Pakico nos mester biba den pica? Si nos por confesa y keda liber di pica, pasobra pica ta trece berguensa, tristesa, gruñamento y murmuracion.
Confesion ta importante pa bo relacion cu Dios y bo prohimo pa bo curason por tin paz y hopi importante cu un simpel confesion por trece paz den bo hogar y cerca henter bo famia. Aworaki hopi hende ta bao di depresion. Awel confesion ta un remedi hopi importante pa cura depresion, pasobra bo ta cura prome cu bo yega dokter.
Confesion ta entre abo y Dios. Pa bo dobla bo rudia dilanti di esun cu sa tur cos di bo y habri bo boca y papia cu Dios y ricibi pordon di Dios pa bo pica y restaura bo relacion cu Dios. Den Salmo 32:5 David a bisa: “Mi a admiti mi peca na Bo y mi inikidat mi no a sconde. Mi a bisa: “Lo mi confesa mi transgrecionnan na Señor y bo a pordona e culpa di mi pica.” Locual a haci David un hende homber conforme na Dios su curason, no ta e cantidad di guera/bataya cu el a bringa, pero su obediencia, confesion y humildad a hacie un homber di Dios.
E motibo importante pa nos confesa nos pica ta cu mientras tanto nos no confesa, diabel ta sigui acusa nos dilanti di Dios y nos comunicacion cu Dios ta kibra. Manera ta para skirbi den 1 Juan 1:6: “Si nos bisa cu nos tin comunion cu Dios y sinembargo nos ta cana den scuridad, nos ta gaña y no ta practica e berdad.”
Si nos bisa cu nos no tin pica, nos ta gaña nos mes y e berdad no ta den nos.
1 Juan 1:9 ta bisa: “Si nos confesa nos picanan, E ta fiel y husto pa pordona nos nos picanan y pa limpia nos di tur inhusticia.”
Ora nos ta den pica hende por probecha di nos, pasobra nan sa cu tin algo scondi den nos bida y nan por uza e motibo ey pa perhudica nos.
Pero Dios den su inmenso amor, ta pordona nos, pasobra Su palabra ta bisa nos cu cualkier persona cu bin na Cristo, persona nobo e ta y tur cos bieu a pasa y haci nobo.
Hopi matrimonio ta kibra of ta den kibra pa falta di confesion, pasobra hende no kier acepta nan fout, pidi despensa y pordona, pero ta prefera di bay hues, divorcia, kibra cu e promesa haci na Dios y perde nan famia.
Confesion ta bendicion. Pastoor Marcel Balootje
