Serge Mansur no ta un cara desconoci y ta hopi critico riba diferente apunto cu tin di haber cu nos isla. Un post di dje diamars riba rednan social a capta nos atencion y a traha un noticia di dje tambe y cu kisas lo ta bon pa gobierno tambe tene cuenta cun’e.
E tin di haber cu e autonan di cu stuurwiel na man drechi. Un fenomeno cu a introduci su mes na Aruba y te cu awe, tin algun mil di e autonan aki tambe riba nos isla.
Mansur a comenta cu e ta observa diferente cos cu ta pasa. Obviamente ta un discusion cu tin un tempo caba ta andando, tanto na Aruba como na otro caminda. Mansur a bay check riba internet wak si por haya cifra y haci un investigacion. Na Canada por ehempel tin basta tempo caba cu e autonan aki tambe ta drenta eynan. Eynan a haci varios estudio cientifico den un periodo basta largo cu ta mustra bon cla cu autonan RHD den paisnan cu ta core otro banda di caminda, tin un incidencia hopi mas halto di accidente.
Te ora cu el a vocifera esey riba Facebook diamars y el a crea un discusion y esey ta sano pa tin discusion, pa papia di e cosnan aki.
Manera cu Mansur a post, e lo desea pa autoridadnan atende cu esaki. Si ta asina cu nan ta forma un peliger, salud y bida di nos ciudadanonan, ta mas importante cu cualkier otro consideracion cu por tin.
Kico mester haci
Tin un cantidad di e autonan aki na Aruba. Segun Mansur, si gobiernonan a permiti e autonan aki drenta, a cobra invoerrechten, a duna nan number, a registra nan, e ora no por di un dia pa otro bisa e doñonan cu e autonan aki ta ilegal.
Mester duna nan e derecho adkiri, di e autonan cu tey caba. Pero ta pone un fecha por ehempel for di tal dia e autonan aki no por drenta y e ora cu tempo lo nan stop di ta na Aruba of casi ningun lo tin mas despues di un periodo. 10, 15 of cualkier otro cantidad di aña.
Su opinion
Mansur a agrega cu si intencion no pa ta vocero di e discusion aki. El a djis pone su opinion y pa e keda te ey. Ta compronde cu tin hende cu ta beneficia sea nan haya un bon auto pa poco placa, of cualkier otro beneficio cu hende lo por tin. Pero Ta kere con cu bay, e salud y e siguridad di no comunidad ta mas importante.
Mansur no tin nada di haber cu ningun compania di auto, ni di piesa, ni di seguro, nada di esey. Ta su opinion personal el a duna.
Mas keho
Den pueblo por a scucha hopi keho. Por lo menos di hendenan cu Mansur conoce y ta papia cu n’e. Mayoria kier pa e asunto aki wordo atendi cun’e.
