Un caso hopi serio a keda registra diasabra den oranan di merdia. A drenta informacion cu un dama turista a wordo atraca y hasta a purba mishi cune den forma inmoral durante e proceso.
Na caminda di e patruya di Strand Politie a wordo menciona tambe cu tin un van blanco tinted glas cu e maniatico of atracador a huy bay cune. Polisnan a topa un van na caminda y a pare pa controla pero parce esaki no tabata e sospechoso. Polis a yega na e Fisherman Huts na Malmok y ta papia cu un turista femenino. E ta papia spaño y parce di ta procedente di Argentina. El a splica Polis cu e tabata banda di e Mangrovenan panort di Fisherman Huts. E tabata den su bikini gosando di e beach, solo y santo blanco. Diripente e homber maniatico a presenta y atake cu menos bon intencion. El a ranca e persona y pushe.
Tur esaki a sosode y tin hende a mira tambe. E homber cu ta traha na un watersport eybanda a mira asina mes cu e cos a sosode poco leu. E ta atende cu hendenan cu ta bin pa huur board pa windsurf etc. Ora el a mira loke a sosode y cu e dama turista a logra libera, mesora a bay canto di caminda pa mira e auto cu e maniatico sexual kier a huy bay cune. A mira cu ta un van blanco cu glas scur. No a logra coy e number di e van. Si por a splica cu e homber tin short roos bisti.
Tambe polis durante nan interogacion a haya mas of menos e apariencia di e maniatico sexual y atracador cu a comete e acto contra e dama. Personal di Jeugd en Zeden Politie a wordo avisa mesora di e caso. Polis di Strand Politie a bay cu e dama na warda pa asina e personal di JZP bin topa cu e victima. Esaki sigur tabata un noticia cu a plama den e area y e pone basta watersport eybanda den un alerta total. Un noticia asina no ta nada bunita pa nos isla. Pesey mes urgente mester actua pa gara e persona cu mente criminal aki. Polisnan di Strand Politie a haci un tremendo trabou na e sitio papiando cu e victima pero tambe diferente testigo.
