“Awe nos ta na vispera di un decision importante den corte pa e revitalisacion di nos districto San Nicolas y pariba di brug di e proyecto di hotel, Secrets of Baby Beach, cu lo habri porta pa un desaroyo economico pa nos parti di e isla”, asina Errol de Freitas, presidente di San Nicolas Business Association (SNBA) a vocifera.
“Ta bon pa informa nos comunidad y e pueblo di pariba cu en realidad e hotel ya caba ta un echo! E problema ta e monton di caso di algun bisiña tras di otro constantemente cu ta keda pospone construccion di e proyecto pa algun detaye den e bouw vergunning”. San Nicolas Business Association a sigui bisa cu segun nan, henter e caso den corte ta pa via cu supuestamentw e hotel lo stroba e bista di algun bisiña.
“Ta bon pa nos duna un bista di kico e balor financiero di e proyecto aki ta pa San Nicolas y pariba di brug. Ta pronostica cu lo crea 800 cupo di trabou directo durante construccion. Mas 835 cupo di trabou directo den su prome aña despues di apertura y no menos di 1300 cupo di trabou indirectamente. No pa papia mes di e spinoff effect pa comercio directo, carrentals, restaurants, tours, suppliers di cuminda, supermarkets, pa djis menciona un par”, segun Errol de Freitas. Pa loke ta aspecto financiero, s inversion aki lo traduci den prosperidad pa e districto. Den e prome aña lo nifica 30 miyon pa pariba di brug y den su di 5 aña mas di 62 miyon florin! E turista averahe ta gasta $50, esun di Secrets lo cuminsa na $90, pa ilustra 12.3 miyon den su prome aña di existencia y 30 plus miyon den e di 5 aña.
San Nicolas Business Association tin tur confiansa cu hues mañan lo tene cuenta cu tur e aspectonan aki, na momento di tuma un decision. Ta hopi tata y mama di famia ta pendiente e proyecto hotelero aki pa por garantisa pan riba mesa, anto cerca di cas mes. Y mientras algun ciudadano kier proteha nan bista, e interes economico di henter e pais ta pendiente di e desaroyo aki awo.
