Awe mainta un total di cuater minister hunto a firma pa un proyecto di camara di siguridad cu SETAR. Ta trata aki di e ministernan Dangui Oduber, Rocco Tjon, Ursell Arends y Geoffrey Wever, cu hunto a firma e acuerdo inter-ministerial entre cuater ministerio pa di cuater fase di e proyecto di camara di siguridad cu ta hopi importante pa nos localnan pero tambe nos turistanan.
E exito di nos turismo ta depende di diferente factor. E ta depende di vision, maneho, inversionnan den mercadeo, inversionnan den producto Aruba y un factor hopi importante ta inversionnan den siguridad. Na momento cu turistanan uza search engines pa busca nan destinacion di vacacion, un factor cu ta determinante ta siguridad. Aruba keto bay ta considera e pais mas sigur den henter e region di Caribe y esaki ta un ventaha grandi cu nos tin y ta algo cu nos mester percura pa mantene.
“Nos gobierno a cera un acuerdo cu nos compania estatal Setar pa provee, instala y mantene camaranan. Nos ta hopi contento cu cuater ministerio por a uni y pone fondonan disponibel pa pone camara den henter area di Oranjestad. Esaki lo trece mas siguridad pa nos localnan pero tambe specialmente nos turistanan crucero. Mi ta gradici Minister Tjon pa ehecuta un otro bon proyecto pa Aruba, ministernan
Wever y Arends pa pone fondonan disponibel y tambe Setar pa por bay ehecuta un proyecto hopi importante pa siguridad di nos isla”, asina Minister di Turismo y Salud Publico, Dangui Oduber, a vocifera awe.
Prome cu aña 2017 no tabatin camara di siguridad. Tabatin un proyecto di camara si cu nunca a mira luz di dia. Awe Gabinete Wever-Croes II tin 250 camara instala caba tur rond di nos isla.
