Richard Frank di Asociacion di empleadonan cu un contrato laboral Individual den servicio di W.E.B. Aruba N.V. (“VWI”) a confirma cu nan lo apela e veredicto di hues di dia 10 di maart 2021 riba e caso sumario entre VWI y WEB. Na mes momento VWI lo entama un bodemprocedure pa investiga e hechonan profundamente y condicionnan legal specifico relata cu e cortamento unilateralmente di salario y condicionnan secundario di empleadonan di WEB.
VWI, despues di a consulta cu su consehero legal riba e veredicto di hues di 10 di maart 2021, no ta di acuerdo cu e veredicto y ta di opinion cu e no tin un base legal pa sostene. Pesey e miembronan di VWI a vocifera masalmente nan resolucion pa medio di votacion, pa apela e veredicto di 10 di maart 2021 den Hoger Beroep y tambe pa bay den hopi mas profundidad pa cu e detayenan legal di e caso aki pa medio di un bodemprocedure.
VWI ta di opinion cu e hues di e caso sumario entre VWI y WEB teni riba 11 di februari 2021, a duna un veredicto den cua e ta practicamente “laba man” y a “dump” su decision di e caso den e ‘pos sin fondo y indefini’ di e concepto di ‘interes general’, lagando tur consideracion di e derechonan mandatorio (bindend recht) cu ta cubri legalmente e contrato laboral cu e empleado tin cu su dunado di trabou, esta WEB, un banda.
VWI ta considera e veredicto di e caso sumario entre VWI y WEB uno insolito y hopi pre0cupante pa cu e integridad y consistencia di e estado di derecho cual Aruba supuestamente ta. VWI ta reitera un biaha mas cu VWI ta reconoce cu Aruba ta den un situacion financiero hopi precario. VWI kier yuda y contribui cu su ‘granito de arena’ pa por alivia otro personanan cu a perde nan trabou y/of ta pasando den momentonan financieramente dificil. No laga tin ningun duda den esey.
Sinembargo, loke VWI ta trece den disputa ta e manera, na opinion di VWI, ilegal y dictatorial cu Gobierno di Aruba, Utilities Aruba N.V. y WEB kier impone e cortamento di salario riba e empleado di WEB. Gobierno di Aruba tin su leynan cu e mester cana pa por exigi unilateralmente entrega di propiedad di ciudadanonan priva (cual salario y condicionnan secundario ta propiedad di e ciudadano) bou di e motivacion cu e entrega di salario ta necesario pa cu ‘interes general’.
Ta evidente cu Gobierno di Aruba no a respeta e leynan aki y a scoge pa cana un caminda di impone y dicta como accionista di Utilities Aruba N.V. y, pues indirectamente, di WEB Aruba N.V. tambe, bou di e supuesto excusa di ta exigencia y condicionnan di Hulanda pa haya asistencia pa cu fondo di likides. Hulanda por wel a pone condicionnan pa cual Gobierno di Aruba mester cumpli cu ne pa por haya e asistencia di likides, pero Hulanda no a bisa Gobierno di Aruba pa bay haci esaki na un manera contra ley.
Por ultimo, VWI, despues di a consulta cu su consehero legal, ta di opinion cu e veredicto di 10 di maart 2021 di e caso sumario entre VWI y WEB no por keda asina manera cu e ta. E veredicto aki, si lag’e asina y e bira un hurisprudencia legal oficial, ta trece un peliger cu ne pa e derechonan di henter e clase trahado di pueblo di Aruba.
E veredicto di hues den cual corte ta supuestamente hustifica e uzo di ‘interes general’ como base pa bari tur otro leynan mandatorio for di mesa, sin sondea y investiga den mas profundidad ki consecuencia of base legal por tin pa haci esaki, ta un veredicto cu VWI ta considera precupante y hasta peligroso.
‘Interes general’ no ta un instrumento pa Gobierno di Aruba haci loke e kier den momentonan dificil, of pa un hues “laba man” di un caso compleho cu un veredicto cu, na opinion di VWI, ta basa su mes riba argumentonan hopi suak y sin base legal.
