Mayornan di Robert Henriquez, director di Elmar cu a wordo retira, ta preocupa cu nan yiu a perde trabao na un manera inhusto.
Sra. Margo Henriquez-Maduro, mama di Robert Henriquez, a comenta cu na momento cu e yiu a anuncia cu nan a suspende, e mama no a pensa cosnan lo a bay asina.E no a pensa nunca cu nan lo a schors’e. El a keda semper cu e lo bay haya su trabao bek. Tambe e mama a topa cu prome minister na misa y sr. Croes a papia cun’e bisando di su yiu homber, cu e ta traha na DOW, cu e tambe nan tin pensa di kit’e.
Croes a bisa e mama, cu tin pensa di kita Robert Henriquez, y cu sindicato a bisa cu lo kit’e. Eynan tambe prome minister a acerca e mama na misa, y a puntr’e ki pase. Henriquez-Maduro a comenta cu ta papiando riba di su yiu homber, Robert Henriquez cu nan kier kit’e for di Elmar. E sindicato ta papia riba dje. E ora ey prome minister a splica pa no worry cu sindicato y nan ta papia pa papia. E ora Henriquez-Maduro a contest’e, cu e ta laga tur cos na pia di Señor. E mes no a pensa cu cosnan asina a bay.
E prima di Robert Henriquez a purba di haci tur cos p’e, pero e no por a haci mucho cos. Esun cu ta na cabes, ta esey ta dicidi. Te eynan cu e mama sa, despues cu nan a schors Henriquez, e mama a kere sigur e lo bay traha bek. E ta un director y tin un responsabilidad grandi riba su cabes. Y no ta un mucha cu a bin mesora bin traha, cu e tin experiencia.
Tempo cu el a bin, no tabata tin trabao. El a traha cu Coastal, traha cu Valero y nan tabata kier’e bon. Mirando cu e tabata sa cu Valero tabata bay cera, el a solicita na Elmar, cu tabata tin mester di hende y entre tanto hende, nan a scog’e pa su capacidad.
No ta un mucha cu no a studia, segun e mama. A pasa den malo y bon, pa yega te eynan. Sra. Henriquez-Maduro a splica cu e tabata papia hopi cu e yiu, pa asina e traha manera mester, pa ningun hende no tin nada di bis’e. Pero e sindicatonan a pusha tur hende den su contra. Nan no tabata kier’e. Otronan no tabata gust’e. E tin di haci su trabao. Den pasado prome minister a splica cu e no tabata na altura di e retiro di Robert Henriquez, pero sra. Henriquez-Maduro no ta kere esey, mirando cu ta e secretaria di e prome minister a bin trece e carta di retiro for di Robert Henriquez. Na October nan a dun’e su retiro. E tabata pendiente cu e lo a bay haya su trabao bek.
Esaki sigur ta algo cu no ta bon. Mester pensa riba e ser humano, mester pensa. Si a kit’e mes, mester a dun’e un otro trabao. E tin famia pa cria. E tin dos yiu. Un yiu cu a caba su scol cu ta na universidad y tin uno cu ta bay colegio. Asina ta, e tin famia y e tin su obligacionnan pa cumpli cun’e. Henriquez-Maduro ta splica cu e ta compronde cu politica ta un cos. Esey e ta haya cu e ta inhusto. Nan a busca tur manera wak kico e tin. Nan a bolter tur su luga, su oficina, wak si por a haya algo, pero nan no a haya nada. Tabata dianan hopi dificil pa tanto e mama y tata di Robert Henriquez.
Si por ehempel e tabata tin 10 aña di servicio, por a busca un manera di busca un trabao. E no a traha segun contract. Ta su trabao e tabata. Nan a lastr’e manera cu nan tabata kier. Henriquez-Maduro ta mama, pero no ta pasobra cu el a traha 8 aña cu e gobierno anterior y cu el a traha un aña cu esakinan, no a spera cu cos a bira asina. E mama a keda decepciona. E ta un hende devoto y hopi fe. Tur a bin na e mundo aki, nos tur ta humano. Pero no na e sistema aki, e ta fastioso, segun sra. Henriquez-Maduro. E no ta haya cu e ta bon, con e retiro a bay.
