24ora a papia cu Joanne Frans, kende ta mama di Kiana Harrigan, un hoben di 16 aña cu ta perdi for di diaranson merdia. Ta sospecha cu e mucha a bay cu un homber adulto cu ta bisa di ta su pareha.
Diaranson mainta e wela di Kiana a bah’e na scol na EPB San Nicolas. Ora cu e wela hunto cu e bisawela a bin buske bek merdia pa 2’or 15, e wela a haya un yamada for di un number desconoci. Na telefon tabata Kiana bisandonan pa dal bay y cu e mes ta bin cas. Sinembargo, e no a yega cas mas.
E mama ta describi Kiana como un studiante di derde klas horeca; un mucha muhe hopi keto cu casi no ta papia, pero cu ta bou mal influencia di un adulto cu ta abusa di dje mentalmente.
Den pasado Kiana tabatin acercamento cu un homber adulto cu a bay cera pa motibo di actonan pornografico cu e mucha. Actualmente ta trata di un homber di 31 aña cu ta presenta su mes como su guy.
E mama ta kere cu ambos a bin den contacto cu otro via Facebook. Di loke e mama sa, e homber yama Alexander Dubero. E tabata na Hulanda antes y tambe tabata cera. “Mi yiu muhe ta cu e guy ey. Con por ta cu un homber di 31 aña tin un mucha muhe di 16?” E mama ta puntra, añadiendo cu ora e homber a aparece den bida di su yiu, e tabatin 15 ainda. “E homber ta yama cas di mi mama puntra pakico nos a kita su telefon; cu nos no tin derecho como mayor di kita e telefon.”
Frans ta bisa cu, na su opinion, e relacion cu su yiu ta basta bon ya cu como mayor el a bis’e cu mester ta amiga y si tin problema cu un guy, nan por papia easy. Pero cu e no por ta un homber di 31 aña cu tin tattoo riba nek y brasa. Frans tin e voogdijschap di Keana, pero e hoben mes ta biba na cas di su wela y su bisawela.
Mama di Keana a bay polis diaranson anochi pa notifica cu e mucha ta perdi. Luna pasa el a bay Jeugd en Zeden politie pasobra e mucha a post un potret di un man tur na tattoo den su carson.
“Nos ta stime y nos kier pa e bin bek. Nos ta preocupa p’e. E bisawela ta hopi malo aworaki na cas,” e mama ta bisa. Ta pidi pa tur cu sa unda Keana ta, pa por fabor yama avisa.”
Por ultimo, e mama ta bisa cu tin hopi homber eyfo cu ta tuma mucha haci y mester bin un ley cu un mucha no por bay zomaar f’e cas of tin sex cu adulto. Frans ta bisa cu tin un buraco den ley, paso si e mucha tin 16 aña, bo no por haci hopi si e ta sexualmente activo caba.
“Aworaki como mayor nos ta riba un One Happy Island, pero sin mucho yudanza. Mi sa cu tin coronavirus andando, pero esaki ta e problema andando. Tin hopi hende ciego, pero nan tin cu habri nan wowo.”
