Semper creciendo y innovando pa ofrece na su oyentenan e miho programacion, Magic 96.5 FM ta evoluciona den su formato.
Magic 96.5 FM a nace na 1998, kiermen den e asina yama e “late 90’s”. Su repertorio, combinando e exitonan di 80’s – 90’s y e exitonan actual, semper a cay na bon agrado y a keda vigente cu su audiencia. Cu transcurso di tempo, e oyente a crece den su smaak y Magic 96.5 ta scoge pa crece hunto cu ne.
Segun e N.A.B. (National association of Broadcasters) Promotions, Advertisements a genera na 2021, 28.5 miyon trabou y a genera $ 7.1 Trillon na benta, cual a demonstra e poder pa draai economia segun e reportahe aki. Ta spera cu pa 2026, e business di promotion y advertising lo apoya 31.9 miyon di trabou na Merca y lo genera $ 9.5 triyon.
Aki na Aruba tambe por bisa cu varios empresa y negoshi ta support media en general creando un apoyo pa un grupo grandi di trabou. Esaki ta conta pa Radio, TV- Social Media- agencianan di publicidad.
Esaki ta e motibo tambe cu e emisora MAGIC FM ta sigui crea, sondea posibilidadnan nobo pa complace y adapta na trendnan nobo den e industria di medionan di comunicacion cu ta contribui grandemente den stimulacion di nos economia local tanto directo como indirectamente.
Pa mantene e grado halto di complacencia, Magic ta anuncia cu, ademas di e seleccion varia consistiendo di e exitonan mas gusta for di 1980 pa 2022, lo tin un enfoke particular riba e musica di decada 90. E oyente kier keda actualisa cu e produccionnan mas nobo, mientras ta sigui disfruta di e temanan cu a marca cada etapa di su bida.
“Nos playlist lo ta dirigi cu influencia di e decada di 80’s & 90’s”, asina director Erin Croes a comenta. “Nos kier pa nos oyentenan gosa scuchando e temanan ey cu ta graba den nan mente y curason, pasobra esey ta e temanan cu ta forma parti di e soundtrack di nan bida. Musica ta trece recuerdo y nos ta bay biaha tur dia den tempo bay bin.” Den e proximo dianan, Croes a splica, ta bay cuminsa sinti e diferencia den programacion. Magic 96.5 FM ta recorda cu nan puntonan di contacto semper ta habri pa tur oyente cu ta desea di scucha un tema en particular. Sea bo ta na cas, na trabou of den auto scuchando, bo por pidi e cancion ey cu tanto bo ta gusta y Magic ta complace bo.
