WEB a scoge pa bin cu e sistema di automatisacion pasobra Aruba ta un planta di energia so e tin. No ta manera paisnan grandi, por ehempel Merca of Europa, cu tin diferente planta di produccion, cu ta interconecta cu otro. Akinan ta WEB so ta produciendo coriente. Kiermen tur e peso, e stress ta bin riba WEB. Na momento cu un windpark mester cay afo of un ekipo di produccion cay afo, un otro mester reemplac’e pa no afecta e suministro. Esey ta e reto. Te unda por yega, no tin un cifra fiho, pero si kier bisa cu ta bay target e maximo, e optimum mix cu ta entrega energia renobabel y energia a base di fuel, sea gas of heavy fuel oil cu tin awor aki. Naturalmente ta basa riba e filosofia cu WEB ta uza di RAS (Reliable, Affordable, Sustainable). E parti di Affordable ta importante. Pa WEB affordable ta nifica cu e no mag di tin un efecto cu ta aumenta tarifa. Si e combinacion ta ofrece un reduccion, e ta haya un go ahead di gerencia.

Mantencion

Actualmente e diferencia di prijs entre gas y fuel oil no ta grandi. E prijs di heavy fuel oil y gas no tin mucho diferencia actualmente. Ta papiando di prijs entrega na WEB, no prijs riba mercado, prijs ora cu sak’e for di suelo na Merca of otro parti di mundo, sino e prijs cu ta haya ofreci na WEB. Na e momentonan aki prijs riba mesa no tin mucho diferencia. E beneficio grandi di gas ta haci cu pa e ultimo añanan, e prijs di gas ta keda hopi stabil, mientras cu e prijs di fuel ta subi baha, manera un wip wap.

Ecogas

Segun Oduber, na ultimo gas cu Ecogas a provee no tabata cuadra cu specificacionnan den contract. Ta bezig ta evaluando un otro alternativa. Esey ta hopi prematuro pa menciona algo riba dje, pero keto bay WEB no ta give up riba e proyecto eynan pasobra Aruba tin un problema grandi cu desperdicio y WEB lo kier forma parti di e solucion. Ta bezig ainda ta mirando algun alternativa cu toch por yuda Aruba en general, cu e problema di sushi cu tin.

Planta

E planta a core pa algun dia, segun Oduber, pero si loke a sosode ta cu e gas cierto componentenan cu tabata fuera di locual tabata stipula den e contract, no tabata cuadra y pa e motibo ey a para e suministro te ora cu haya un solucion pa esey.

Na mesa

Na December a papia ultimo cu gerente di Ecogas y ta bezig internamente tambe ta buscando alternativanan. Tin un inversion para eynan cu tambe kier saca beneficio di dje. Regardless ken ta e supplier, Gobierno tambe ta buscando un solucion. WEB tin hopi informacion caba cu lo por yuda pa yega na un solucion pronto.