Desde September aña pasa, tabata tin un ola di calor inmenso riba Aruba y depues cu muchanan a wordo manda cas y a yama reunion, tabata tin un comision cu a lanta y e comision aki a tene un accion di firma cu a tuma luga durante di e ultimo lunanan. Awor aki ta cla pa entrega nan.

Segun Maroushka Cornelie di Simar, esey ta bay tuma luga otro siman. Por bisa cu durante di e accion aki, a haya hopi informacion di scol, di coleganan di cosnan cu a tuma luga durante di e ola di calor. A haya sosten tremendo di veld. A haya sosten hasta di mayornan tambe, di publico en general, pa loke ta e accion aki.

Ta cla pa entrega e firmanan. Minister di Enseñansa di e accion y a ricibi splicacion entorno esaki. Tambe e ta entusiasma pa ricibi e miembronan di Simar, cual ta riba dia 24, diaranson venidero. Pa 2’or y mey lo aglomera riba e plenchi Shon A Eman, cual ta p’ariba di Parlamento y pa 3’or lo entrega e carta y firmanan.

E carta aki ta encera cu Simar ta pidi den e carta e minister institui un comision y traha riba e posibilidadnan pa percura pa tur scol cu no tin airco y gymzaalnan, pa esakinan haya nan mas pronto cu ta posibel. Tambe den e carta ta menciona e motibonan pakico airco ta importante y ta bisa tambe cu airco no ta ni un luho, ni un necesidad mas, sino un derecho.

Tambe den e carta ta haal aan ley, dos fragmento di ley, caminda cu ta bisa cu siguridad di e trahado ta importante y ta menciona literalmente temperaturanan den cual un trahado tin cu traha, cu no ta cuadra cu e temperaturanan cu normalmente tin, pio ainda den e temporada di horcan cu un djis lo bolbe cuminsa y lo bay di Juni te cu November. Ta haci un yamada pa colegnan den veld bin, pa hunto haci esaki, pa mustra con importante cu no ta wega esaki ta. Abo cu ta esun cu ta para den candela ta esun cu sa miho. Tambe ta pidi sosten di esnan cu tin airco, pa ta presente tambe, ya cu esaki ta mustra solidaridad.

Tin cu agrega cu a mik riba por lo menos 65% di e veld y a yega y pasa esey. Ta un lastima pa menciona cu algun director no a coopera. No tabata nada den sentido cu nan no ta duna e sosten, pero mas bien tabata un temporada cu politica tabata hunga un rol, cultura di miedo a hunga un rol y tambe individualismo, pasobra a hasta haya hende cu a bisa cu nan mes ta traha pa nan airconan, y no ta sostene un accion asina, mientras cu no ta tur cos tin e mesun capacidad of forsa pa logra haci esaki.

Ta enfoca riba e parti positivo, cual ta cu a logra y ta cla pa entrega e firmanan na minister Lampe.

 

No ta tur tin’e mesun cos

E comision no a bay den direccion di pensa ainda kico lo por ta consecuencia. Loke si a bi dilanti den e reunion prome cu e comision aki a nace ta cu si no bin nada di parti di gobierno, lo mester bay pensa den un direccion diferente. Awor aki ta bezig riba un nivel positivo. A haya reaccion positivo tambe. Claro e ta un reto hopi grandi pa e minister di enseñansa. E situacion financiero no ta mucho di gaba. Pero ta kere si cu si ta traha cu ley y ley ta bisa claramente cu siguridad di e trahado ta importante, e ta bisa claramente tambe cu gastonan di tur loke ta wordo uza den un scol cu e ta directamente bao di Gobierno of no, ta gobierno mester cubri’e, cu lo bay exigi pa esakinan wordo cumpli.

 

E ta costoso

Simar ta conciente cu ta algo cu por pasa den un chupa di dede. Sa cu e ta tuma tempo. Pero loke ta pidiendo den e carta, pa minister sondea e posibilidadnan y wak kico por wordo haci pa a corto plaso tur scol na Aruba tin por lo menos un overdekte y pa tur scol ta aire acondiciona. No ta pensa awor aki den cuanto tempo ni nada. Lo kier tende awor aki, a base di e carta, for di e minister, kico e ta pensa cu lo por bay wordo haci, kico ta e ideanan y for di eynan ta cuminsa cana. Un cos ta sigur si, cu e maestronan no ta tolera mas pa bay tende aki 20 of aki 30 aña. Kier tende aki tanto tempo, lo percura pa tur scol ta aire acondiciona. Ta mas of menos un 25 scol no tin airco of parcialmente tin, of cu tin airco cu tin cu wordo cambia.

 

Sondeo

E accion ta pa airco, pa e localnan y gymzaal. Kiermen, no airco den gymzaal. Airco den gymzaal sigur ta bon bini, pero esey no ta parti di e accion. Tin docentenan cu pa añanan largo ta trahando den solo. Si mira e hendenan aki nan color, nan cuero, por mira cu ta hendenan cu ta traha tur dia demasiado ora den solo y esey no ta sigur. E no ta humano. No ta aceptabel. Pesey a bin e parti di salanan pa ehercisio. Por lo menos un overdekte pa cuminsa. Airco pa e salanan ey no a menciona esey.

Tin scol cu ta coopera cu otro pa comparti gymzaal. Tin scol cu ta cerca di otro, manera di un stadion, un YMCA cu nan ta haci uzo di nan. Pero no ta tur scol tin esey y no ta tur ora e por bay segun un rooster di un scol of tin tambe por ehempel un scol secundario, banda di un scol basico, e ora nan no por uza e mesun localidad pa motibo di siguridad door di e comparacion di edad.

Departamento di enseñansa ta haciendo un sondeo riba full Aruba, pa wak cua scolnan tin airco, cualnan no, cualnan tin airco cu tin cu wordo cambia. Tur esey ta bezig caba. Door cu sa cu esey ta bezig, Simar ta warda riba esey. Loke sa ta cu mas of menos 25 scol no tin of parcialmente tin y tambe cu ta mayoria ta scolnan primario y ta di tur scol bestuur. No ta solamente di un schoolbestuur, ni di gobierno so. Mayoria di scol di gobierno ta completamente aire acondiciona.