Awe tardi polis tabatin dolor di cabes cu gruponan politico, specificamente esunnan di MEP y AVP. Dos grupo grandi di campañadonan a topa otro den Diamantbergweg y tabata tema cu e situacion lo por a bay fo’i man. Hasta comisario Trudy Hasell a core presenta na e sitio pa sigura cu e situacion ta bou di control. Ta sinti cu tanto AVP y MEP a firma un protocol cu lo no core parada awe pero no necesariamente a cumpli cu nan mesun promesa!
For di trempan caba polis tabata bezig cu diferente candidato di MEP cu a sali den caravana (o sea parada) pa bay topa na Carnival Village pa djey sali hunto ora cu e lider di MEP yega. Polis tabatin bista riba nan y asina cu nan a sali a cuminsa kibra e parada cu diferente candidato. A manda e autonan den diferente direccion.
Partido AVP tabatin un actividad grandi banda di ex-hotel Bushiri riba L.G. Smith Boulevard. Ey candidatonan a yega cu nan siguidonan. Na San Nicolas e candidato Mike de Meza tabata moviendo cu su grupo. Den Diamantbergweg a topa cu un grupo di MEP den parada biniendo di direccion contrario. Polis tabata cerca y a interveni.
E lider di MEP tabata den e parada di MEP. Polis a pidi refuerso pasobra a sinti cu e cos por bay for di man. Grupo di ambos partido a aglomera y a stop riba caminda. Comisario Trudy Hassel tambe a presenta. A papia cu ambos partido. Finalmente un grupo di MEP a bay abou y esun di Mike de Meza di AVP a keda warda te ora e parada di MEP a pasa pa nan a sigui.
E tensionnan ta subiendo algun dia prome cu eleccion y esey mes ta e motibo cu Polisnan tin basta trabou pa evita confrontacionnan inecesario entre contrincantenan politico.