Partido Patriotico Aruba (PPA) lo traha riba tereno social, pero ta enfoca riba e parti di famia. Na Aruba tin un crisis familiar y mester sostene nan hopi. Tambe comunidad di Aruba ta hopi kibra. Vision di PPA ta di bay den tur bario y districto di Aruba, trahando mas cerca di pueblo.
Canando den bario ta loke nan kier, pueblo ta pidi pa traha mas cerca di otro. E candidato di PPA, Enid de Kort, a bisa cu nan tin pensa di uza e MFAnan pa traha cu famia y den un team multi disciplinario. Banda di esey, nan kier traha 24 ora pa dia cu dokternan di cas cu ta sinta den e MFAnan pa ta mas cerca di pueblo.
Tambe e partido ta pensa di bin cu diferente programa, cu ta enfoca riba famia. Un ehempel ta cu tin crisis den riba pareha. “Nos problema di pareha ta hopi grandi. Eynan nos mester bay reenforsa nos parehanan”, el a expresa. Lo haci esey door di duna hopi workshop (tayer) na con pa mantene un bon relacion. Con pa comunica na un manera efectivo, con pa trata e problemanan emocional. Tambe mester enfoca hopi riba educacion di mayor. Den e mundo di awendia hopi mayor no sa mas con pa educa nan yiu cu bon resultado. Pasobra e mayornan a lanta den un otro epoca cu awendia.
Segun de Kort, awendia tecnologia ta manda y p’esey tin di sostene e mayornan hopi. Pero tambe e team multi disciplinario cu PPA kier bin cu ne, esta trahado social, terapista, verpleegkundige, polis di bario manera antes tabata funciona caba, conhuntamente mester sinta den MFA p’asina pa mira con ta resolve e problemanan complica. Y pa asina nan por reenforsa e famianan.
Pa partido PPA, famia ta e enfoke na Aruba. Tambe mester bay dialoga cu e tereno laboral, pa por mira con por yuda e mayornan riba e tereno ey. E realidad ta cu awendia e mayornan tin di traha hopi ora iregular, por ehempel warda di 4:00 pa 10:00, caminda e muchanan ta keda na cas sin supervision, el a bisa. E mayornan ta traha y e muchanan no tin un red social. Tambe mester dialoga hopi riba tereno laboral cu e instancianan por bin reforsa mayor ariba pia di trabou. Segun de Kort, el a haci esey hopi den pasado como terapista y e tabata hopi efectivo. Pasobra hopi mayor no lo yega facil na un workshop anochi ora nan ta cansa.
Tin cu bay traha n’e parti sistemico, el a bisa. E famia conecta cu e tereno social, e tereno laboral, pero tambe esun di husticia. Aworaki ta bisando cu e muchanan ta bayendo den hopi criminalidad. Pero dicon hopi mucha ta bay den criminalidad? Esaki ta bin pa motibo cu hopi biaha nan no tin e supervision na cas, nan no tin e sosten di comunidad y nan ta hayando hopi trauma y tin ora no sa con pa anda cu ne. Consecuentemente nan ta bay riba caya y comete criminalidad.
“Asina ta cu nos tin di bay sistemicamente traha riba tur tereno, pero saliendo for di reenforsamento di e famia”, tabata e palabranan di de Kort. Na Aruba tin di traha pa tur hende tin di florece, pa tur hende reenforsa nan cualidad y habilidad.
