Durante e conferencia di prensa na APA a toca mas tema cu ta di interes. Jossy Figaroa director di APA a splica cu locual ta bay bira un reto, ta pa aki tres aña, kico ta bay haci cu e material cu wordo saca for di e draga na waf di Playa. Como cu ta material di balor, ta bay wak con ta bay sigui haci cun’e. Kisas lo uz’e na Barcadera, of Gobierno ta bisa cu por uz’e pa algo otro. Kier cuminsa pronto cu e proyecto ey, door cu ta bay cuminsa coba. Aunke cu e coralnan cu tin eynan ta morto, pero no kier bay  haci nada sin cu ta envolvi tur e stakeholdernan pa no haya cu ta bisa si, pero preferiblemente pa no ricibi e barconan grandi ey. Ban keda cu e barconan cu tin awor aki. No tin nodo di haci nada na canal, pa preveni discusionnan ey.

Ora cu cuminsa cu e proyecto pa cuminsa prepar’e pa e aña aki caba, pa tur hende ta na mesa, pa ora cu lo ehecut’e aki tres aña pa por sigui trankil cun’e.

E proyecto aki, no solamente ta importante pa APA, pero ta importante pa Aruba, como cu esaki ta sigui bay cu e barconan mas grandi. Nos mester ta prepara pa por ricibi tur barco grandi cu lo bin den futuro. E barconan manera Oasis, awor nos tin Alure, y ultimo tempo a pone un mas den e clase aki, nan ta hopi p’ariba y ta yega te St. Maarten, pero nan ta na Bahamas, ta bay Cozumel, ta bay na Labadie. Hendenan cu ta subi e barconan ey ta repeaters y ta pidi pa bay otro puerto. Hopi di e wafnan den Caribe no ta prepara pa ricibi nan.

Corsou a caba di traha un pier nobo y eynan si nan por ricibi’e caba. Naturalmente nan ta cla pa e Freedom class cu ta biniendo. Si Aruba haci’e nos por ricibi nan. Pero tin cu prepara. Den Caribe tin otro ta ricibiendo tur e barconan cu ta bin abao.

A informa APA cu nan kier bin abao y tin cu bin abao, pasobra no tin hopi otro caminda cu nan kier bay cu e barconan ey. Nan kier keda den Caribe cun’e y ta contento cu esey. E crecemento di e pasaheronan crucero ta bayendo bon. Tin espacio pa sigui crece den Playa. Ta bay si mas na unda cu kier pa mas den verano, den e periodo entre April y October, pa haya mas barco.

Con ta haci cu esey

Ta bayendo conferencianan. Ta bishita e companianan, hunto cu ATA y hunto cu ministerio. A bishita e cuartelnan general. Ta keda mustra nan cu Aruba tin interes pa nan sigui bin. Ta papiando cu nan y ta duna nan incentivo pa nan bin den e periodo mas abao. Ta duna nan cierto privilegio cu nan por coopera cu e prijsnan y ya cu ta duna e descuento nan ey, por bay evalua pa bin abao. No por haci’e nan so. Pesey ta combersando cu coleganan di Boneiro y di Corsou, pa hunto traha riba e parti ey.

E parti di crucero ta kere cu si sigui manera cu ta trahando awor aki cu lo sigui bon. Tin di wak y esey ta wordo treci p’adilanti continuamente pa no crea un congestion, no solamente den waf, pero dilanti di e waf tambe. Tin hende ta bisa cu e turistanan ta stroba fluho di trafico. APA ta trahando duro cu tur instancia, polis, cu DTP, DSA, tur esnan cu tin di haber cun’e, pa mantene e ambiente cu ta crea pa e turista crucero na un nivel halto y ta contento cu e surveynan cu ta wordo haci, ta mustra cu te cu awor aki, locual cu ta haci na Aruba, ta bon. Pero no mester bay kere cu nos ta den un comfortzone. Mester sigui traha riba e waf. Mester sigui traha pa ora e turista yega, pa pafo di wak e turista sigui haya bon trato. Sigui traha cu e touroperatornan duna tournan di bon calidad. Tur eseynan lo yuda.

APA ta haciendo su parti mas tanto posibel y ta trahando pa tene un bon ambiente riba waf y si tin cu drecha e canal, esey ta responsabilidad di APA. Lo traha cu mucho gusto riba esey.