Papia, papia cu mi Papiamento, laga bo bos resona den universo,
na prome luga, pordona mi pa mi accento, pero pa expresa bo, mi no tin miedo.
Papia, papia cu mi Papiamento, pa mi ta un placer, masha placentero,
di por a scucha bo, di por a papia cu bo, confia bo tur mi secreto y alimenta bo cu mil verso.
Papia, papia cu mi Papiamento, yuda mi skirbi cu poder pa caba cu tur silencio,
elimina tur frontera, disparce tur barera, kibra tur cadena, aleha pena y tormento.
Papia, papia cu mi Papiamento, yuda mi expresa tur mi sintimento,
duna mi tur sabiduria y pone tur palabra den mi boca, pa mi por transmiti tur mi pensamento.
Papia, papia cu mi Papiamento, cu bo palabra lo ta mi remedi y alimento,
aliento fresco pa nos alma, sucu pa nos lipnan, melodia p’e horeanan di nos pueblo.
Papia, papia cu mi Papiamento, pinta mi poemanan cu e colornan di nos cielo,
laga cu mi frasenan por nace manera awa cu ta brota magicamente den desierto.
Papia, papia cu mi Papiamento, no permiti cu mi palabranan bula bay cu biento,
laga mi transmiti tur mi energia y e calor cu ta domina mi paden y mi entendimento.
Papia, papia cu mi Papiamento, duna mi luz y comprondemento,
siña mi pa ta mas concreto cu mi palabranan, pero inmenso manera e firmamento.
Papia, papia cu mi Papiamento, conta mi den bo idioma e historia di nos pueblo,
pa mi por compronde bo miho, mi ta scucha bo cu’n actitud positivo, dispuesto y atento.
Laga mi conoce nos baranca un poco mas y tur cos expresa den mi lenga materno,
permiti mi papia cu fluidez di nos dushi tera, cu e palabranan di mas perfecto.
Papia, papia cu mi Papiamento, esaki t’e momento ideal, e tempo di mas perfecto,
pa papia di nos simbolonan nacional mi ta sinti mi emociona y realisa pa por comparti tur mi talento.
Laga mi pone fantasia den mi poesia, manera un flor por nace di ilusion y cu bida riba tera seco,
mi ta gradici bo pa por a permiti mi papia cu bo na tur momento, pa bo atencion y bo tempo.
Papia, papia cu mi Papiamento, laga cu cada mensahe por balia cu melodia y accento,
no laga mi nunca keda keto, lagando palabranan y pensamentonan muri den olvido y silencio.
Laga cu cada frase por rima cu melodia y supla riba nos tera sin frontera, pa por brasa cu e caricianan di biento,
siña mi conoce den fondo e rais di cada palabra, e diferencia cu ta marca bo tono ritmico y poetico. ..!
