Durante e conferencia di prensa yama pa Departamento di Impuesto, Meverly Romano, vocero di e entidad a declara cu tin rond di 85 mil plachi di number registra.
Esaki ta encera categoria A, cual ta dunando te awor aki te cu 76.400 plachi di number. Hunto cu e otro categorianan ta yega den careda di 85 mil plachi di number.Si wak e cantidad aki, nos tur sa mesora cu tin masha hopi vehiculo registra, esta auto, truck, motorcycle. Loke kier pa e publico en general compronde, cu esaki ta bay ta un temporada sumamente druk.
Ta purba di yuda tur cliente na e forma mas eficiente posibel. Pesey a traha un planning tambe, con ta bay start cu otorgamento di e plachinan. Pero e lo keda un periodo sumamente druk.
No solamente na caha na Camacuri of na e MFA nan den e diferente districtonan, pero tambe na e localnan y edificio anexo unda cu ta otorga e plachinan di number. Ta bay ta sitionan cu lo bay tin basta aglomeracion di hende, caminda cu kier pidi publico en general comprension pa e situacionnan aki.
Pa loke ta trata un rato e parti di pago, tin cu bisa cu na Camacuri ta trahando desde December caba non-stop te cu atardi. For di mainta ora cu nan cuminsa. No ta cera merdia pa break y ta sigui asina tambe durante tur e simannan cu ta bin.
Tur e clientenan cu ta desea di acudi na DIMP durante pauze di merdia, ta posibel. DIMP ta keda habri durante oranan di merdia. Solamente e seccion di caha na Camacuri y tambe na e oficinanan den districto.
Pa loke ta e cantidad di cliente cu por permiti pa haci pago riba un dia, tin cu anuncia cu Departamento di Impuesto tin pa e cantidad di clientenan a acudi, por ripara cu Januari a habri super druk. Tur dia sala ta yen, pero e cantidad di cliente, no por keda acepta tur persona cu ta yega.
Dado momento tin cu tene cuenta tambe cu e siguridad di e personal y tambe siguridad di e clientenan.
Pesey tambe, si cierto momento bira asina druk cu e sala ta yen yen y e ta bira insigur, lo bay stop di duna number. Esey kier pa publico compronde. Pensando un rato, si dado momento pa 10’or di mainta por ehempel, a yega 500 pa 600 persona den sala, lamentablemente, tin cu stop di duna number pa e mita dia eynan.
Bo por haya personanan cu kisas ta bay critica e parti eynan, pero loke kier pa e publico compronde, cu no por keda pak e luga cu hende. No por laga tanto hende keda drenta. Pesey ta pidi publico en general, pa tene cuenta cu e dianan aki lo bay bira dianan sumamente druk. E no ta bay pasa na Camacuri so. E lo bay sosode tambe na e oficinanan den districto.
