Linda Orman, vocero di e bond di taxistanan y tambe e cinco taxi Centralnan, a comenta cu nan tin diferente punto cu nan ta bezig cun’e hunto cu Minister.
El a splica cu nan ta prefera di atende e puntonan un pa un of dos punto cada biaha. Si ta bay papia di diferente cos, por ehempel dies punto, e ta bira van de haak naar de tak. E ora bo no ta yega na un acuerdo tampoco. E ora bo ta bay bruha kico a palabra, kico no. Ta prefera e ora dos punto.
Te trece punto uno dilanti, ta bay di acuerdo. E bureau di e minister ta duna nan puntonan tambe, djey e ta bin e decision. E ora punto dos. E ora ta bin na decisionnan mas concreto y tin chens pa trece cosnan dilanti extensamente kico ta e cosnan cu tin cu cambia y drecha.
Ta berdad cu nos leynan ta hopi anticua. Orman a splica cu tin cu bay punto pa punto, cuminsa drecha loke cu ta bieu. Ley mester tin un bachi nobo, mas modernisa y esey tin cu bay traha riba dje, punto pa punto. Cada biaha cu ta bin cu un cambio den ley, si ta un punt mes, e tin cu haya aprobacion di mayoria. E tin cu bay ministerraad, tin cu bay parlamento, Gobernador tin cu firm’e. Ta un proceso largo. Miho haci’e bon, sin problema. Ta bezig ta buscando backup huridico riba esakinan, for di eynan ta bin cu espacio pa puntra.
Orman a añadi cu den e lista di prijs, nan tin agrega e ahuste cu nan a pidi. E ta bay cover e BBO, aumento di gasolin, belasting, etc. E lista di prijs, a palabra un porciento cu e minister y ta mira cu e Economische Zaken ta bezig cun’e. For di eynan, pa otro siman, lo keda cla cun’e.
Despues di basta tempo
E ahuste aki ta despues di 9 aña. Orman a splica cu a busca informacion cerca CBS. Semper grupo di taxista tin miedo di hisa cierto rutanan, pero a yega momento cu tin cu aumenta. Awor aki e pricelist ta traha den un estilo di zonificacion. E ta hinca un manera cu proximo biaha cu e aumenta, ta hinca e porcentahe den dje y e ta aumenta full e tarifa, na e porciento cu ta acepta pa wordo hisa. E ta bira sin dolor di cabes. E ta facil, hinca den e sistema. Ta djis hinca e porciento pa ordo ahusta y e ta cla.
Peso pisa
E peso di mas pisa ta fuel. Di tur dia ta gasolin. Djey tin e auto pa mantene, manera piesa, taira, brakes, azeta, tur eseynan ta cosnan cu tin cu tene cuenta cun’e. Despues tin gastonan personal, manera coriente, awa, huur, hipoteca, entre otro.
