Presidente di San Nicolas Business Association (SNBA), Andres Hernandez despues di e Townhall Meeting a bais cu “El a sali miho cu nos a pensa. Mi a expect si mas asistencia di pueblo dor cu esaki ta bay defini e futuro inmediato di San Nicolas. Sinembargo, el a sali hopi bon, nos tabatin participacion di Ministernan Andin Bikker y Chris Romero y di Ton Jansen di Hulanda. Ami ta pensa cu e tabata un anochi hopi positivo, pero esaki no ta suficiente. Tabatin hopi pregunta. Esaki tabata e prome di hopi mas cu mester bini”.
San Nicolas Business Association mes a presenta nan proyecto yama “Vision”, prepara pa un grupo di experto, den cual no a inclui e refineria como e punto principal of e anker di e crecemento di San Nicolas. “Laga nos no lubida cu nos tabatin e refineria habri caba, na 50% coriendo, nos tabatin mester di mas volumen, mas hende y toch esaki no a logra. Pues a bin idea pa traha riba puntonan di crecemento cu na principio nos tur a wak e, cu nos a brasa e idea y nos a traha riba dje te na e prome draft”. Asina Andres Hernandez a enfatisa.
“E siguiente paso ta pa Gobierno instala un grupo di experto, no necesariamente politiconan, pa yuda forma e framework aki anto dune un concept. Nos tin hopi pa traha riba dje ainda, e ta un concepto cu hopi expansion, e tin hopi dede, pero e man di tur loke por pasa no ta nos. Nos ta nobody, nos mester di pueblo den esaki. Den esey mester pensa riba educacion, un Universidad pa San Nicolas, mester mas vivienda. Nos kier evita emigracion di hobennan bandonando San Nicolas. Nos kier prepara nos mesun hendenan pa bin cu Boutique Hotels di no mas cu 25 camber. IMSan por ehempel ta papiando di bin cu turismo medico, pero falta camber pariba, pues esaki ta un oportunidad. Cu e plannan aki lo crea oportunidad pa inversionistanan chikito y mediano di Aruba mes, miho si nan ta di San Nicolas, pa nan mes tuma rienda di esaki”, segun Andres Hernandez.
Na final, e Presidente di SNBA a termina bisando cu “Mi mensahe principal ta cu pueblo mester compronde cu nos ta trahando pa pueblo. Nos mester pueblo pa cana dilanti di nos pa nos por sigui logra locual nos ta buscando pa San Nicolas. Esaki ta e prome biaha den 15 aña cu mi ta den e organisacion, cu nos a logra alcansa un momentum, den cual nos tin cooperacion di Prome Minister, di Minister Bikker y Minister Romero. Nos tin plannan pa desaroya caya principal di San Nicolas den un mini New Orleans style, plannan ta traha caba y awe nos a wordo confirma cu Minister Otmar Oduber ta di acuerdo pa nos sinta papia y duna nos e guia riba kico nan a traha riba dje caba. Pues esey tambe nos tin, nos no por perde e momentum aki. Y no ta solamente SNBA, sino ta tur e asociacionnan cu ta na San Nicolas hunto ta trahando y cu pueblo”.
