Resientemente den kolaborashon ku Brantwer di Kòrsou, klientenan di Sentro di
Detenshon i Korekshon Kòrsou a yuda hasi limpiesa na e pòst di Brantwer Barber.
Ku e esaki klientenan di SDKK ta duna bèk i alabes mustra nan gratitut pa e oportunidatnan ku nan ta haña, siendo den detenshon, pa aportá na e bienestar general i higiéniko di Kòrsou.
Den un forma amikal i bon organisá gerensia di Brantwer Kòrsou a pone nan vèn, un siman,
disponibel, pa asina e trabounan por a tuma lugá den un forma relámpago na nan pòst na
Barber. Ku esaki Brantwer Kòrsou, gerensia di SDKK i e klientenan di SDKK na nòmber di
Minister di Hustisia, señor Quincy Girigorie, ke demostrá diferente balor kompartí.
Na promé lugá e importansia di potensialnan humano presente. Na di dos lugá, e balor di traha huntu. Na di tres lugá, e nesesidat pa tene Kòrsou limpi. I na último lugá demostrá ku e
klientenan di SDKK ku a faya ku nos leinan vigente, ta siña ahustá nan komportashon pa
unu positivo. E focus riba pensa positivo, aktua positivo i siña di otro ta di sumo importansia
den nan trayekto di resosialisashon den SDKK. Na final Brantwer Kòrsou i SDKK a evaluá henter e proyekto i konhuntamente a palabrá ku SDKK lo bai sigui duna un man den futuro i vice versa. Di e forma aki SDKK ke aportá di un forma struktural na entre otro limpiesa di nos pais.
