Un rato pasa, polisnan di Landsrecherche a detene Maria Leoncita Arends na su cas, situa na Sero Blanco. Ta sospech’e di tin mas di haber den e investigacion cu a haya e nomber di Avestruz. Esaki ta di tres detencion den e caso aki.
Diadomingo atardi a detene su yiu, Rebecca Richardson y ayera mainta a pasa busca Jeff Franken. Cu detencion di Leoncita Arends awe, e ta bira e di tres sospechoso deteni, mientras cu tin un lista largo ainda di sospechosonan.
E CASO AVESTRUZ
Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
