Hopi studiante ta pensa dos biaha prome cu nan bay sigui nan estudio avansa den exterior, pa motibo di e gastonan sumamente halto cu nan ta crea sin cu ainda nan a caba nan estudio.
Leonardo Figaroa, lider di Partido Direccion Politiea (PDP) ta enfatisa cu nos aparato publico na Aruba ta ineficiente pasobra awe nos tin 0.2% di ambtenaar cu ta studia. P’esey a manda un logverzoek pa minister di Enseñansa unda cu a subraya e cifranan di e dropouts, kier sa exactamente cuanto esaki ta.
“Tin hopi studiante na EPI por ehempel cu no por caba nan estudio pasobra nan tin cu traha debi na e costo di bida, y esey ta un punto importante pa mi como politico cu ta carga primordialmente e lucha pa hobennan studiante.” E hoben politico ta bisa di a pidi minister di enseñansa pa duna cifra di cuanto ambtenaar tin un nivel academico den posicion tambe cu nan ta pa asina por mira y haya miho bista riba loke falta. Hobennan cu ta bay Hulanda pa cay den debe y studia duro no por haya trabao pasobra nan fam no ta Croes segun Figaroa. E ta bisa cu nan no ta pertenece n’e famia di e gobierno aki cu ta percura pa nan fix nan mes. Tambe hobennan cu ta cay den debe na Aruba cu ta caba nan universidad, cu ta studia y inverti, tampoco no ta haya trabao.
“Esey ta algo cu mester pasa pa pasado.” Figaroa ta subraya cu e dos mil ambtenaar aki of mas cu a drenta gobierno pasobra nan a pega un sticker of bandera, of campaña pa un politico tin dos opcion, tin cu of studia pa tin e posicion cu bo tin of busca maatregel pa manda bo sector priva. Como politico, ningun otro ta papia riba e temanan aki. “Pero ami si ta papia riba dje pasobra no por hustifica cu awe di cada florin, 92 cen ta bay na paga debe di anterior, unda cu 8 cen so e hoben tin pa inverti den su futuro.”
Figaroa ta enfatisa cu un debe y obligacion di e pais di mas o menos 56 mil florin e baby cu a nace ayera na hospital tin – esey ta e compromiso cu Leonardo Figaroa ta haciendo cu e futuro generacion. A entrega un bezwaarschrift tambe riba e logverzoek di minister di labor kende a indica cu cifra di desempleo bao hoben a baha cu 9%, PDP kier sa basa riba ki estudio ta uzando e cifranan aki. A manda un otro logverzoek riba e overheidsaparaat, pasobra kier sa si tin un estudio – pasobra na 1990 durante gabinete di Henny Eman tabata tin estudio haci unda a duna conseho e tempo ey na gobierno pa reduci gasto di ambtenaarij y pa manda hendenan overspoelig den ambtenaarij bay sector priva. “Nos kier wak e rapportnan ey. Pueblo tin derecho di wak e rapportnan ey pa nos por haya miho bista di kico ta e situacion actual.”
