Riba diamars, 15 di augustus ultimo, a huramento Leomar Angela como un miembro reemplasante na Cas di Corte. Prome cu el a tuma e posicion aki, e tabata traha na Ministerio Publico, prome como fiscal y e ultimo shete añanan como Abogado General na Corsou y BES.
Prome e tabata raio na Hof y despues cu el a finalisa e periodo ey na aña 2000, el a traha tres aña como hues-comisario den casonan penal. “Mi conexion cu Hof y edificionan di Gobierno den Punda ta fuertemente hancra,” el a bisa. “P’esey e fase nobo aki den mi carera tin algo manera bolbe cas.”
Durante su prome aña como miembro reemplasante di Hof e lo ta staciona den e parti di casonan penal di Hof, debi hustamente na su experiencia anterior y su afinidad cu ley penal.
E lo funciona na Aruba y Sint Maarten, pasobra el a yega di traha eynan como un miembro di OM. Denter di poco e lo biaha pa Aruba pa su prome sesion (Red: otro siman).
Pa loke ta Corsou y Boneiro (BES), lo mester studia pa cada sesion si tin conflicto di interes. Na final di e aña lo haci un evaluacion di su funcionamento pa su eventual nombramento como un miembro completo di Hof. “Mi ta spera cu pa e momento ey mi por concentra riba otro areanan di ley y desaroya mi mes den un hues di tur area,” Angela a agrega.
E periodo aki ta nifica pa Angela un tempo yen di cosnan nobo, no solamente debi na e tematicanan huridico compleho, pero tambe a causa di e comunidad chikito di e islanan, unda cu tur hende conoce otro y e ta conoci pa hopi tempo caba como un miembro di Ministerio Publico.
“Mi ta comprometi pa haci e transicion aki cu dignidad y respet pa nos comunidadnan,” el a enfatisa. “Den cualkier caso, mi ta haci esaki cu hopi entusiasmo.”
