Despues cu Minister Glenbert Croes a bolbe Aruba di un biahe pa Europa, a sali riba rednan internacional un acuerdo cu Aruba a cera Acciona. Den conferencia di prensa di Prome Minister mr. Evelyn Wever Croes, e no por a duna mucho informacion di e acuerdo aki, cu excepcion pa bisa cu e documento firma ta un Memory of Understanding (MoU). Dialuna mainta e minister encarga, Glenbert Croes, a sigura un acuerdo final cu Acciona lo no afecta of stroba e acuerdo cu Aruba tin actualmente cu e compania Eagle LNG.
“E dosnan aki ta bay co-existi cu otro. Bo ta bay tin green hydrogen y gas natural. Esun no ta stroba e otro.”
Pa loke ta e acuerdo di Eagle LNG, un biaha mas e mandatario a trece dilanti cu e no tin conocemento di contenido di e contracto pasobra e ta algo entre e compania y WEB. E parti di secresia, ta encera cu como mandatario e no tin acceso na esaki. Pero e ta pone su confiansa cu gerencia lo sa di defende interes di WEB y di e pueblo en general. “Si nan a firma un acuerdo cu a haya aprobacion di Hunta di Supervision, anto e lo ta na interes di Aruba.”
Den e caso di Acciona e no ta kere cu lo tin un palabracion di No-Disclosure. E MoU ta conoci y e no ta inclui den esaki. Y a bisa “aunke mi ta cautelosamente optimista, mi ta feliz pa Aruba, mira cu no obstante e slanan grandi di pandemia, ta biniendo otro oportunidadnan pa Aruba. Oportunidadnan cu ta trece prosperidad sigura pa e siguiente generacion.”
E proyecto di Eagle LNG ta bay yuda WEB cu su gastonan di operacion. Ya caba a cambia diferente ekipo cu ta uza Heavy Full Oil pa gas, cu ta hopi mas barata.
