E proyecto ‘LeerOrkest Aruba’ ta un iniciativa di Johnny Croes, docente di musica y miembro di directiva di Aruba Symphony Festival & Academy, pa trece esaki na Aruba. Den luna di december a tuma contacto cu Marco de Souza, fundado di e proyecto LeerOrkest na Amsterdam pa mira e posibilidadnan pa un LeerOrkest pa Aruba.
Dialuna 29 april De Souza tabata di bishita na Aruba y hunto cu Johnny Croes a reuni cu Rudy Lampe, Minister di enseñansa y cu Andin Bikker, Minister di Husticia pa mira e posibilidad pa Aruba tambe por tin un LeerOrkest. A splica cu esaki ta un forma nobo di educacion di musica na unda tur mucha, principalmente pa esnan di menos recurso ta haya e oportunidad, durante oranan di scol, pa siña toca un instrumento.
E programa LeerOrkest na Amsterdam ta existi pa 12 aña caba y ta masha exitoso na unda mas cu 3000 mucha ta haya les na 18 scol basico y cada scol tin su orkesta. Corsou tambe tin su LeerOrkest pa 2 aña caba cu resultadonan hopi positivo.
“Muchanan cu haya les di musica ta bira muchanan mas contento y esaki ta hopi positivo pa nan desaroyo, y ta evita cu nan por bay de mal caminda. Es decir, ta comproba cu e LeerOrkest tin balor educativo, cultural y hudicial preventivo”, segun Johnny Croes.
Mirando e importancia cu e proyecto aki tin pa cu e desaroyo pa nos muchanan y tambe pa cu e comunidad a dicidi pa firma un MOU entre Minister Lampe, Minister Bikker y Grapperhaus, Minister di husticia di Hulanda pa pronto Aruba tambe por tin su LeerOrkest.
