Tiro di cañon pa saluda Zr. Ms. Groningen di Marina Real Hulandes

E barco di guera Zr. Ms. Groningen di Marina Real Hulandes a yega Aruba pa prome biaha y a ricibi’e cu un ceremonia di saludo di 21 tiro. E ta forma parti di e “ocean going patrol vessel (OPV)” di Holland-klasse, hunto cu e barconan Zr. Ms. Friesland, Zr. Ms. Holland y Zr. Ms. Zeeland. Dia 21 di april 2011 e barco a drenta awa y Zr. Ms. Groningen ta den funcion bou Marina Real Hulandes desde 29 di november 2013.

E barco ta patruya den e area di Caribe pa trabounan di Kustwacht pero tambe pa defensa y e “Joint Task Group Mericano”, segun Timon van Dishoeck, Comandante di Marinierskazerne Savaneta. E ta un tradicion cu cada barco di guera cu drenta waf di Aruba pa prome biaha, ta tene un ceremonia special. Ta haci mesun cos na St. Maarten, Corsou y Aruba, unda cu e barco a pasa y a tira 21 tiro como saludo.