Diamars mainta, Landsrecherche a detene Selma Arends, secretaria di Minister Paul Croes, relaciona cu e caso e investigacion cu a haya nomber di Ibis. Unda a detene y kico ta e acusacionnan, ainda no ta conoci.
Bao guia di Ministerio Publico, Landsrecherche y Cuerpo Policial di Aruba ta haciendo basta tempo caba investigacion di posibel casonan di corupcion (ambtelijke omkoping), cu ta encera primordialmente cu e Minister di Labor anterior tabata pidi y/of tuma placa di soborno en cambio di un excepcion (ontheffing) di e toets di arbeidsmarkt.
Un arbeidsmarkttoets positivo di parti di DPL (Departamento di Progreso Laboral) of un ontheffing di esaki ta un condicion pa DIMAS saca un permiso di trabao na Aruba. E ontheffingnan tabata wordo saca dor di e Minister, den mayoria di e casonan, despues cu DPL a duna conseho negativo. Cu e ontheffing aki, stranheronan tabata por a haya permiso di trabao. Durante e investigacion a lanta ademas e sospecho cu e Minister a haci su mes entre otro, culpabel na labamento di placa, ambtsmisbruik y pone hende na trabao ilegalmente.
Dia 21 di augustus ultimo a detene Minister Paul Croes y su chauffeur Roque Aparicio. Te cu awor a scucha un total di 30 testigo y 21 sospechoso. A detene un total di 10 di e sospechonan ey pa interogacion. Di e 8 nan aki, 5 ta encarcela ainda. E sospechosonan cu ta den libertad, ta sigui como sospechoso den e investigacion. E decision tocante cua di e sospechosonan aki lo wordo persigui, lo wordo tuma door di Ministerio Publico na momento cu e investigacion ta cla.
Banda di scucha testigonan y sospechosonan, e ekipo di investigacion a traha e ultimo lunanan ta analisa e material tuma den beslag te awor. Particularmente e inventarisacion di pruebanan digital tuma den beslag (informacion riba computer y por ehempel, telefonnan) ta costa hopi trabao.
Manera ta conoci, dia 28 di maart ultimo, Husticia a bishita un total di 13 diferente adres, incluyendo Bestuurskantoor, relaciona cu un investigacion cu a haya e nomber di Ibis. A detene algun hende den e caso aki, den cual Ministerio Publico ta acusa e mandatario personalmente di a tuma regalonan, promesanan y/of servicionan relaciona cu “ontheffing” di e “arbeidsmarkttoets” dor di cual stranheronan a haya oportunidad pa haya permiso di trabou.
Concretamente e acusacion contra Minister Paul Croes ta: “Ambtsmisbruik” y duna permisonan cu no tabata mag di traha na Aruba a base di nan “verblijfstitel”, oportunidad pa toch traha na Aruba. Tambe ta acus’e di labamento di placa di sobornonan ricibi. E sospecho di “ambtelijke corruptie” ta consisti di pidi/tuma soborno a cambio di “ontheffing van het arbeidsmarkttoets”.
