Camara di Comercio, semper y cuanto ta sostene si desicionnan cu lo yuda naturalmente comercio, pero tambe pueblo en general. Si tin cosnan cu nan no ta di acuerdo cun’e, nan lo bisa esey. Pero si tin cosnan bon, nan lo anuncia esey tambe, segun presidente Ernst Mohamed.
Tin cu bisa cu tabata tin varios comision cu ta trahando cu gobierno, pero toch tin cierto cosnan cu kier trece na atencion atrobe.
E prome ta e crisis heffing. Den esaki a saca un comunicado di prensa y ta keda atrobe cu ta algo necesario. Pero un biaha mas ta boga pa e ta temporal.
Hunto cu esey, a forma un comision na KvK. ATIA ya a manda nan concepto di un reforma di belasting pa asina haci e cobramento di belasting of dunamento di belasting un tiki mas husto, cu tin hende ta cumpli otronan no. Ta bezig cu recomendacionnan cu por haci e cobramento di belasting completo pa tur hende, e ora gobierno por haya full e montante cu nan mester pa nan por logra nan budget.
Recogemento di sushi
Comentario riba henter e situacion unda cu a haya hopi yamada riba dje riba e situacion di Serlimar y Millieuheffing, ta Camara di Comercio ta contento cu nan a cambi’e y tin recomendacionnan cu mientrastanto el a wordo hala, lo manda un carta oficial despues y lo duna prensa un copia, di recomendacionnan cu Camara di Comercio tin riba e millieuheffing di Serlimar. Un biaha mas Camara di Comercio ta urgi tur minister, si ta decisionnan cu nan ta bay tuma y ta toca na comerciantenan, pa por fabor, envolve Camara di Comercio. Nan por avisa of por yuda den wak con por present’e mas suave of mas miho of mas directo, of por dicidi e momento ey cu no ta bay sostene un decision. Na prome instante tin cu bisa cu no a sostene e decision ey, pasobra e lo pone un otro costo mas riba comercio. Dia pa dia Camara di Comercio ta purba di aumenta e diferente aspectonan pa nos economia. Ta bezig ta yuda gobierno pa diversifica nos economia y pa trece proyectonan aden pa trece placa den nos economia. Tin diferente grupo cu a bin eyden. Ta contento cu por a sinta cu minister Otmar Oduber y tambe prome minister Evelyn Wever-Croes, cu por a intercambia di idea con pa yuda pa trece mas placa den gobierno.
Esey di parti di Camara di Comercio, ta aprecia esey y ta contento cu cierto aspectonan riba esey ta wordo traha riba dje di biaha. Otronan ya caba a wordo traha riba dje. Kiermen cu ta druk bezig ta yuda. Naturalmente Camara di Comercio ta sostene un proyecto manera Fast Ferry y tambe un beautification di downtown San Nicolas. Ta sostene San Nicolas Business Association y nan desaroyo. E mensahe di Camara di comercio ta, ta pa cuminsa haci algo. A mira hopi rapport. A papia di hopi idea y nos como Arubiano sa kico nos kier y no mester ningun consultant mas pa bisa unda nos tin cu bay y kico nos mester haci. Tin cu djis cuminsa haci’e y e Fast Ferry y e beautifucation di San Nicolas, ta un di nan. Trece algun negoshinan internacional pa San Nicolas y cuminsa desaroya San Nicolas, sin cu nan mester depende atrobe riba un refineria, cual ta algo awor aki cu ta spera cu lo pasa toch. Pero no mester pone speransa mas. Camara di Comercio ta pensando riba otro alternativa, y un di nan ta Fast Ferry y Beautifucation y desaroyo di San Nicolas. E business plan cu SNBA a bin cun’e, Camara di Comercio ta sostene pa nan haya un tiki bida eynan.
Un otro aspecto cu ta trahando duro riba dje, cual ta spera pa e aña aki lo logra, ta e Incubator. Pa haci Aruba un gran incubator. Tin hopi negoshi y na e momentonan aki ta probecha pa felicita e cursistanan cu a gradua di e curso cu Camara di Comercio a duna di small & medium enterprises. Esey ta indica cu hopi hende, por lo menos esunnan cu ta gradua, ta boga pa habri nan mesun negoshi. Incubator ta un concepto pa esnan cu no por haya hopi placa, toch por pone nan idea y nan oficinanan hunto den un edificio y asina toch logra poco poco pa crece, sin cu despues di un of dos aña nan mester cera pasobra e huur of caminda cu nan ta ta mucho caro. Ta un concepto cu ta trahando riba dje y ta spera cu pronto sra. Sonja Veldthuizen, cu ta trahando alma y cuerpo riba dje, hunto cu educacion, pa por bisa cu si tur cos bay bon, e aña aki Entrepeneurship lo bay tin algun proyecto piloto den scol basico y scol secundario. Mas y mas ta purba di yuda esnan cu ta hoben pa crece, pa cuminsa haya e pensamento di creatividad di entrepeneurship y haci nan soñonan realidad. Ta spera tambe e aña aki cu e business conference, e oradornan cu ta biniendo, por habri porta. Ta invitando diferente otro instancia pa nan bin y haci negoshi cu Aruba. Ultimamente por a mira RVO tambe di Hulanda, tambe ta yuda pa percura pa gobierno por exporta. Awor aki Camara di Comercio ta purba di yuda entrepeneurnan y tambe tur hende na Aruba pa bay haci negoshi internacionalmente pa trece placa bek Aruba.
Esey ta algun di e puntonan cu Camara di Comercio ta trahando riba dje. Lo keda den contacto cu prensa cu mas frecuencia pa duna opinion riba cierto aspectonan, Mohamed a splica por ultimo.
