Den oranan di marduga pa mainta Kustwacht di Aruba a intercepta un barco cu bandera di Cameroon cu a resulta di tabata transporta mas cu mil kilo di droga. Ta trata di e barco Areza, cu ademas di un carga normal, a sali for di Venezuela rumbo pa Grecia, segun por a compronde.
Aressa ta traha na aña 1978, pues tin 42 aña caba den operacion como un barco di carga. E tin un capacidad di 2649 ton DWT y ta midi 95 meter di largura y 13.22 meter di hanchura. Su “call sign” ta TJMC15.
E barco a bandona Venezuela diadomingo den oranan di atardi. Diamars den oranan di marduga e tabata cerca di Aruba y Kustwacht a dicidi mesora pa ordena e barco y su tripulantenan pa keda para. Y despues a ordena nan pa coy direccion di waf di Aruba.
Na momento cu e barco Aressa a yega den oranan di marduga, a pidi varios auto di transporte pa transporta e tripulantenan pa e diferente Wardanan di Polis.
Mainta autoridadnan a cuminsa rista e barco y a topa e cargamento grandisimo cu tin un balor multimiyonario.
Keda pendiente pa mas informacion.
