Mas di un artista local ta preparando pa Carnaval 2020 y no ta un secreto cu diferente di nan a graba caba y expone nan creacion p’e temporada.
Den e caso aki Krizs no ta un excepcion y e la señala di ta trahando cu Rygel Isabella di e popular banda ‘Buleria’ den su tema pa Carnaval 2020. “Mi lo tin algo diferente na lo tradicional, e idea ta p’e ritmo tin un base di ‘Afro Beat’ combina cu e composicion cu ta totalmente den man di Rygel tambe”, asina Krizs a duna di conoce.
Den e dianan aki nos ta drenta studio di Nigel Dream p’asina tur cos keda ‘netjes’ den nan liña corespondiente, p’asina despues di Pasco lansa esaki. Fecha exacto no tin ainda, pero nos tin 2 fecha den mente caba cu ta diabierna 27 december, diadomingo 29 of dialuna 30, pero for di aki t‘e aya nos tin tempo suficiente pa ‘fine tune’ cualkier cos plus pone un fecha definitivo.
Adelanta tur cos tin su beneficio ya cu ambos ta basta ocupa p’e simannan dilanti te fin di aña, cada un den nan funcion como artista. Krizs ta vocalista di “Perfect Sound” y Rygel ta tecladista di “Buleria” e miho formula ta prepara tur cos tempran pa djis warda e dia yega pa lansa e tema nobo aki pa Carnaval 2020. Adicionalmente loke por adelanta ta, cu lo tin un aparicion special den e tema aki di otro artista popular. Asina ta keda pendiente, pasobra tin algo bon ta cushinando
