Durante e reunion den e lunanan di juni y juli, Kiwanis Club of Aruba a instala cuater miembro nobo, cu a ricibi un caluroso bonbini di parti di e miembronan di e club. President di Kiwanis Club of Aruba, Edalitza Weller, a introduci oficialmente Natasia Dragt, Gay Sherida Spellen, Tracey Werleman y João Soares como e miembronan mas nobo di e club.
Aunke cu e miembronan a asisti caba na algun reunion y a participa na algun proyecto di e club, e tabata un momento special pa instala nan oficialmente como miembro. E persona cu tabatin e tarea pa dirigi e ceremonia di instalacion di Natasia Dragt y Gay Sherida Spellen tabata “Governor Designate” di EC&C, sr. Robert Spellen.
Natasia ta actual “Human Resources Manager” na Marriott Vacation Club, y el a forma parti di e famia di Kiwanis Club of Aruba caba como un miembro activo di Kiwanis Key Club Colegio Arubano. Natasia su deseo di join Kiwanis Club of Aruba ta pa e sigui contribui y aporta na e proyectonan na bienestar di nos comunidad, specialmente trahando cu nos hobennan. Como e sponsornan di instalacion di Natasia tabata; Diane Fleming conhuntamente cu Jo-Anne Arends.
Gay Sherida Spellen ta actual “Operations Manager” na New India Assurance. Sponsor di Gay Sherida Spellen tabata Edbert Schwengle y Governor Designate Robert Spellen. Gay conoce Kiwanis ya cu su famia incluyendo Governor Designate Robert, su tata, ta miembro di Kiwanis. Gay ta hopi agradecido cu e oportunidadnan ricibi y kier haci un diferencia den comunidad door di yuda e muchanan den necesidad.
E siguiente dos miembronan cu a keda instala durante e reunion di e club tabata; Tracey Werleman y João Soares. Tracey ta trahando na Universidad di Aruba y tambe a forma parti di e famia di Kiwanis. E tabata un miembro activo di Circle K Universidad di Aruba. Tracey a forma parti di e directiva di “Caribbean District” na aña 2013-2014, y el a fungi como presidente na aña 2014-2015. Tracey tin e pasion pa keda ehecuta proyecto pa comunidad y traha specialmente cu Kiwanis su “Service Leadership Programs” pa e hobennan, cu ta un di e motibonan pa cual el a scoge pa sigui cu e trabou comunitario. Como e sponsornan di Tracy Werleman tabata Indra Anthony Pereira y Edbert Schwengle.
Y por ultimo a instala João Soares, actual “General Manager” di Watty Vos Boulevard Project Company. João a participa den e proyecto di Kiwanis “School Traffic Signs” cu a wordo instala na 24 scol rond di Aruba. João ta impresiona con organisa Kiwanis Club of Aruba ta, y e proyectonan cu e club ta haci manera entre otro “Hands –On” & “Traffic Awareness”. Su amor y gana na contribui na e comunidad di Aruba ta e motibonan pa cual el a join Kiwanis. Fernando Rigaud y Ryan Kock a fungi como sponsornan pa João. Dilanti di e miembronan presente a presencia e ceremonia oficial dirigi pa “Distinguished Lieutenant Governor ” Giantonio Muller. E sponsornan di e miembronan tabatin e honor di a pin e boton di Kiwanis, haciendo asina Natasia, Gay Sherida, Tracey Werleman y João oficialmente miembronan di e club.
Kiwanis Club of Aruba ta un club cu su miembronan ta hopi dedica y activo, trahando primordialmente na bienestar di nos muchanan y otro proyectonan na beneficio di nos comunidad.
