Diabierna, 26 di juli awo, ta tuma luga den Museo Arqueologico e evento Aruba Caribbean Fair. Esaki a keda anuncia den un conferencia di prensa.
E ta bay ta un actividad varia den informacion y diberticion pa henter famia disfruta hunto, Stanley Dabian di Instituto di Cultura Aruba a informa den e conferencia.
El a splica cu Museo a aserca Departamento di Cultura Aruba, ambos bou auspicio di Ministerio di Cultura, y Fundacion 1403, Fundacion Lanta Papiamento y Stichting Rancho, a logra uni forsa pa haci e Caribbean Fair un evento hopi varia. “Pa Departamento di Cultura esaki ta punto di prioridad den educacion di arte y cultura pa cual ta duna su apoyo na e evento aki,” Dabian a bisa.
Durante e evento Fundacion Lanta Papiamento ta percura pa tin un panel cu ta brinda informacion na pueblo riba idioma Papiamento, su historia y evolucion. Tambe tin wega di Papiamento cu grandi y chikito por participa.
Fundacion 1403 tambe ta un partner den e evento y lo pone na benta e ultimo publicacion, un buki riba Arkeologia. Nan ta encarga specificamente cu esaki.
Riba e dia aki tin diferente workshop, cu ta gratis pa tur bishitante; cuminda Caribense y BBQ (origen di Indjannan).
Dabian a haci un peticion na mayornan pa acudi cu yiunan durante e vakantie aki, unda cu e evento ta cuminsa pa 5.30 di atardi caba y ta sigui te 10’or di anochi.
Suzy Boekhoudt, di Museo Arqueologico Aruba, a splica cu nan facilidadnan a habri parcialmente na e edificio unda cu tin exposicionnan temporario, y a habri cu e exposicion “Caribbean Ties”, cu a habri simultaneamente na 12 otro isla den Caribe y na MUSEON na Hulanda. Den cuadro di esaki, ta haci algun programa publico, cu Caribbean Fair ta un di nan. Di e forma aki kier duna informacion na e publico di un forma hopi recreativo y dirigi na henter famia, mirando cu e ta den vakantie.
E artista Trudy Lampe lo haci un experimento cu e bishitantenan y lo duna un tayer di e tecnica di “coil” cu Indjannan di Aruba y den Caribe antes tabata uza pa traha nan potchi di klei.
Artista local Gloria Feliciana lo duna un tayer di traha prenda cu glas di lama, reciclando asina un material cu no ta pertenece den nos medio ambiente, pero cu Indjannan tanto na Aruba como den Caribe a cuminsa incorpora esaki den nan decoracionnan den e periodo historico despues di e prome contacto cu Europeonan. E lo mustra cadenanan cu por traha cu diferente tipo di material. Su parti ta cuminsa di 5.30 te 7.30.
Otro artista cu tambe a presente ta Maya Lepsanovic, kende ta bini cu tecnicanan mas moderno. E ta duna un tayer di traha un ‘flamingo fridge magnet’ na unda e particpantenan lo decora un pida di (drift)wood cu pintura den colornan Caribense.
E artista contemporaneo Osaira Muyali di Studio O lo presenta e historia tras di e ‘City Art’ di e cabaynan blauw den Oranjestad. E lo papia den su lezing pakico di e colornan di e cabaynan, pakico e sitionan specifico unda cu nan ta poni. E presentacion di dje ta di 6’or pa 7’or. Despues ta sigui e presentacion di e arkeologo drs. Harold Kelly tocante e periodo Archaico, cu informacion nobo di nos historia Indjan di Aruba, cu a sali danki na e investigacion di NEXUS1492. Un investigacion cu a cambia historia di Aruba.
Dr Joyce Perreira, experto den Papiamento, ta presenta un documentario cu lo keda draai den e auditorio. Asina Fundacion Lanta Papiamento tambe lo ta presente cu actividadnan entretenido, promoviendo e dushi idioma Papiamento cu su palabranan origina di idiomanan diferente di Indjan.
Museo Arqueologico Aruba ta situa den Schelpstraat.
