Dialuna mainta a tuma luga un incidente caminda cu doño di un tereno kier a saca un huurdo fo’i su hogar.Ta un situacion fastioso cu e huurdo ta pasando aden, unda cu el a haya informacion diabierna di DIP cu e mester kita su trailer for di e tereno cu e ta huur, mirando cu tin algun inconveniente pa loke t’esaki.
Rosanna Gonzalez ta conta cu e y su famia ta pasando aden. A firma un contract cu e doño di e tereno Rosalba Hernandez, cu a huur un pida tereno di gobierno. Debi cu e tabata kier biba riba custia di hende, e tabata kier p’e pone e meter di awa riba nomber di Gonzalez.
Fuera di esey Gonzalez a menciona cu e meter di awa ta pertenece na e apartamento, pasobra e persona cu ta biba ey ta doño di e meter di awa y e doño kier pa pone e conexion di awa pa bay n’e apartamento y e apartamento ta pega hunto cu e cas. Door cu Gonzalez no a sigui, dialuna Hernandez a cuminsa haci fastioso indicando cu e por sac’e con cu e kier, pasobra Gonzalez no tin ningun tipo di derecho.
Segun Gonzalez, a bin dos persona fo’i DIP diabierna na mal ordo y bisa cu dialuna Gonzalez pa 10:00 am e mester sali pasobra e no tin ningun tipo di derecho p’e keda n’e luga.
Gonzalez na su turno a puntra si no tin ningun ley of instancia cu por ricibie, mirando cu e ta mama di cuater yiu, awo unda e ta bay biba.
Di un otro banda, Rosalba Hernandez, doño di e tereno a menciona, cu e no tin nada di haber cu Gonzalez pasobra e no a deal cu ne.
Huurdo di e apartamento a yega di traha cu Hernandez y a pidie un fabor pa e pone un container te cu januari p’e keda cla y despues bay cu ne.
Loke a sosode nan a pone e container y den menos cu un luna a bin biba ey y agrega mas cos na dje, sin pidi permiso.
Pa Hernandez pone algo extra riba tereno e mester pidi permiso na Gobierno. Tereno cu e ta biba ariba ta un huurgrond. Tur loke e traha e mester pidi permiso pe.
Ta sigui splica cu e personanan en cuestion ta biba na Venezuela, ta invadi teritorio di hende y ta bira di nan.
Loke cu Gonzalez a haci ta pone su luga, traha un pida extra y biba eynan.
Riba dje Hernandez tin evidencia di e sushedad cu tin rond. Tin un contract firma pa huur. Gonzalez aparentemente lo a bay gobierno y hiba Hernandez dilanti y eynan Hernandez a splic’e cu mester disolve e contract haci pasobra no a cumpli cu regla. Tereno no ta di Hernandez pero ta di gobierno. Su cas t’eyriba e tin bos, y si un hende kier haci algo eyriba, mester puntra Hernandez prome. Segun Hernandez, Gonzalez a haci malo y e no tin permiso pa pone ni awa ni coriente.
Pa cobertura mas amplio lesa edicion di TREMPAN mañan.
