Siman pasa diahuebs, ministerio di turismo a tene un reunion cu e ‘airlift committee’ cu ta e comision cu ta consisti di ministerio di turismo, AAA, ATA, AHATA. Un di e tareanan principal di e comision aki ta pa explora posibilidad nobo, di ruta nobo, destinacion nobo pa nos pais, teniendo cuenta kico e pandemia a haci cu nos. Ta tene reunion continuamente pa mira kico t’e oportunidadnan nobo cu por tin pa crea ruta nobo pa Aruba.
Durante e presentacion extenso aki a haya un update di kico ta e capacidad di asiento pa e siguiente winter p’e aña aki y pa 2022. Tambe naturalmente e proyeccion di e cantidad di asiento disponibel pa 2022.
Aruba semper ta conoci como un di e paisnan cu tin miho conectividad den henter Caribe. N’e momentonan aki tin 25 aerolinea ta bulando e destinacion di Aruba.
For di 28 destinacion, di cual esaki ta conduci na 39 servicio. Esaki sigur ta algo hopi excepcional pa tin tanto aerolinea, tanto destinacion y tanto servicio ta bula nos pais n’e momentonan aki.
Di e manera aki ta sigui explora pa amplia ruta nobo, destinacion nobo y tambe servicio nobo.
Loke tabata hopi interesante durante e presentacion cu a ricibi diahuebs ultimo, tabata e proyeccionnan cu tin pa e siguiente winter y tambe pa 2022.
Tin cu menciona cu tur proyeccion ta indica cu Aruba lo bay surpasa e aña 2019 pa loke ta capacidad di asiento cu aerolineanan ta pone disponibel pa Aruba.
Aña 2022 ta proyecta riba un cifra di 1.718.176 asiento, cu ta mas hopi cu tabatin durante aña 2019. Tambe ta esun di mas halto den historia di pais Aruba cu ta pa prome biaha ta haci e proyeccionnan di un cantidad di capacidad di asiento cu tin disponibel asina halto.
Si mira cifra desde 2014 cu tabata 1.3 miyon, con el a keda subi gradualmente. Pa aña 2022 ta proyecta 1.7 asiento, cu ta prometedor pa nos turismo.
Ta demostra e confiansa cu e aerolineanan tin den nos producto.
Ora nan ta pone e asientonan aki disponibel, intencion naturalmente ta pa yena e asientonan aki pa di e forma aki percura pa por tin un aña 2022 sumamente positivo pa nos turismo.
Pa cobertura mas amplio lesa edicion di TREMPAN mañan.
