Ta solamente hunto e exito di educacion por logra, tanto mama como tata mester uni pa asina duna e yiunan e miho educacion posibel.
Hecho cu e tata ta laga e yiunan na encargo di e mama of e mama ta laga e yiunan na encargo di e tata, ta porta habri pa manipulacion, pasobra despues bo ta haya cu e yiu no ta scucha di ningun di nan dos, pasobra e mayornan ta contradeci otro.
Tur decision riba educacion y guia di mucha den e caminda di Dios mester tuma luga cu participacion di tata y mama. (Isaias 54:13)
Un mama no por halsa e yiunan riba su esposo, ni tampoco e tata por halsa e yiunan riba e esposa, pasobra esey ta causa rebeldia y ta pone e yiunan na peliger di bay contra palabra di Dios (Efesios Capitulo 6 vers 1-4).
Nos ta bibando den un tempo dificil, caminda cuater wowo ta necesario pa wak e yiunan y guia nan riba e bon caminda, pero e mayornan mester ta den unidad, cual ta e principio di tur matrimonio (Genesis Capitulo2:24)
Palabra di Dios ta bisa cu e homber lo bandona cas di su mayornan y uni cu su esposa y nan dos lo bira un solo carni y esey ta nifica un solo carni den tur cos, specialmente den e educacion di nan yiunan.
Proverbionan Capitulo 4:3 ta bisa: “Tempo cu mi tabata un yiu pa mi tata, delicado y e unico yiu homber den bista di mi mama el a siña mi y bisa mi: “Laga bo curason tene duro na mi palabranan, warda mi mandamentonan y biba.”
Proverbionan Capitulo 4:23-27 ta bisa: “Warda bo curason riba tur cos, pasobra e ta e fuente di bida. Kita for di bo un boca engañoso. Y tene lip perverso leu fo’i bo.
Bon conseho, disciplina y coreccion mester bin tanto di parti di tata y di parti di mama.
Despues cu boso dos a uni den relacion pa asina boso por tin un yiu, boso deber ta pa boso permanece hunto pa ningun momento e yiu ey no tin falta di boso presencia, amor, comprension, cariño y dedicacion.
Aki nos por mira cuanto biaha mayornan ta lubida riba e encargo precioso cu nan a haya di parti di Dios.
Specialmente mayor mester bisa su yiu, mira bon na unda bo pianan ta hiba bo e ora ey tur bo caminda lo keda estableci.
No bira ni na man drechi y ni na mas robes, tene bo pia leu for di maldad.
Awendia conseho di mayor mester ta firme y na tempo, pa asina vence e consehonan di e mundo di maldad, pasobra si nos ta slow den e atencion pa nos yiunan, tin hopi conseho riba internet pa nan bida, cual hopi biaha no ta esun di mas miho.
Mayor, yena boso bida cu oracion y palabra di Dios, pa hunto boso por guia boso yiu den e tempo dificil aki.
