Na Cas di Cultura a tene celebracion di emancipacion di Surinam, pasobra dia 1 di juli 1863 esclavitud a termina. Esaki no a pasa solamente na Surinam, pero tambe na Aruba, Corsou, Saba, St. Maarten y St. Eustasius. A haci e exposicion cu apoyo di Mo Mohamed.
Nomber di e exposicion ta “A caba”, esta “It’s over now”. E atmosfera con sclavitud tabata antes y con el a desaroya te cu awo ta loke e exposicion ta encera. Segun Valery Williams, di Ketikoti, nan ta pensa cu e antepasadonan lo ta hopi contento cu ta recorda nan pa tur loke nan a pasa aden. A conta cu diferente artista, unda a haci poesia, drama, musica y hopi mas.
Williams a bisa cu ainda tin sclavitud pero den otro forma. Ainda ta haci mal uzo di hende y den algun pais ta tuma hende pa traha, pero ta trata nan manera esclavo trahando desde mainta trempan te anochi laat. Incluso ta paga nan un salario abou, ta traha productonan pa prijs abou y ta haci uzo di muchanan, esta “kinder arbeid” y ta un forma di sclavitud.
E mesun tipo di sclavitud cu tabatin riba plantacion no ta existi mas, a menos cu ta na Africa y Azië. Pero e sclavitud moderno cu tin den otro forma ainda t’ey. Mester expone esaki, specialmente entre e hubentud, unda ta keda duna informacion. Hende mester keda educa nan mes pa sa kico e ta y evita cu esaki pasa.