Ayudo. Esey ta loke dominee Peter Hazenoot ta pidi pa e kerki Protestant na Piedra Plat, cu cada biaha ta blanco di ladronicia. Y esaki ta algo cu ta andando pa algun tempo caba.
Domine Hazenoot a conta cu ta trata aki di un ola di ladronicia desde Juli aña pasa y parce cu no kier stop. Nan ta target mas tanto riba e pastorie, e schuur, e zondagschool, e oficina. E miedo cu nan tin ta cu e edificio lo core mas daño. E dolor di cabes grandi cu nan tin, ta cu cada biaha nan ta bay cu hopi cos di e kerki. Tur biaha esaki ta sosode. Nan ta bezig awor aki cu instalacion di un sistema di alarma, pero ladronicia ta continua, segun e dominee.
Nan a haya por lo menos 9 kiebro. Di e 9 kiebronan aki a denuncia 6 of 7 na polis. Mientras tanto polis a indica cu di cada kiebro, tin cu haci un denuncia. E problema ta cu na varios di e kiebronan, a mira un auto blanco, sea prome of net prome of durante periodo di e ladronicianan.
E auto aki a wordo mira pa mas hende. Durante e simannan cu a pasa a bolbe mira e auto aki. Un biaha e bisiña a wak e mesun auto un biaha rond 2’or y un biaha 4’or di marduga. A yama polis pa mira kico ta pasando, pero no a haya nada. E problema ta cu no sa kico mester haci. Ta haciendo tur cos manera mester ta, ta controla tur cos, ta cera tur cos na lock, pero asina mes nan ta kibra drenta via e bentananan, of ta kibra drenta den auto. Kier mira pa esaki ta soluciona. E dominee a splica cu nan kier pa esnan den vecindario tira un miho bista cu si nan mira algo, pa sin duda, yama polis of pa polis por patruya un tiki mas hopi. A pidi pa esey. Te asina leu no a haya ningun resultado cu por bin cu un mehoracion. Ainda nan ta kibra drenta. Den un periodo di tres siman, a kibra drenta dos biaha. Segun e dominee, nan ta sinti nan mes sin poder, no sa kico mas kico por haci. Unda nos ta como pais, si kibra drenta den edificionan religioso. Si kibra drenta den un misa, e ora tur limite ta perdi, tur limite ta bay. E preocupacion cu e comunidad eclesiastico ta keda cu nan no por funciona na un manera normal. Esey ta nan dolor di cabes. Ta haci un apelacion na polis, na gobierno, na e bisiñanan, pa hunto mira con por soluciona esaki pa e por para.
Investigacion
Segun domine Hazenoot, polis ta bin ora cu yama nan y nan ta traha un proces verbaal. E ora nan ta bin firma esaki. Di e 9 biaha nan, 2 biaha departamento tecnico a bin, anto ta riba peticion di e dominee mes. Den ultimo biaha, nan no a bin, mientras cu a pidi pe. E dominee no sa mucho di esaki y ta specula. Nan ta sinti cu como comunidad protestant, nan no ta tuma nan na serio y ta entristese nan, mientras cu falta di poder ta pone nan rabia. Esey ta nan problema awo.
Tur cos horta
No tin mucho cos mas di horta, segun dominee. Tur cos a wordo horta. Ora cu e sospechosonan drenta den nan oficina, ta pa un router, cu segun Setar nan no por haci nada. For di e zondagschool, nan ta bay cu un pochi cu 25 florin aden y tambe nan ta kibra pa bay cu fan, cual ta practicamente nobo. Na cas di e dominee, si nan a bay cu hopi cos, manera nan bicicletanan, tools, tambe tools di e voluntarionan. Tur cos a wordo horta. Awo no tin practicamente nada mas, pero asina mes nan ta kibra drenta, hasta pa nada. E dominee mes ta biban banda di e kerki. No por keda henter anochi vigila. Esey ta trece un problema cun’e, e dominee a finalisa.
