Kenneth “Kenny” Flanegien no ta un persona desconoci. Su famianan mes ta di Calabas, pero pa varios aña caba e ta bibando na Pos Abao y ta traha riba su mes.
Awo, bo ta puntra bo mes kico su trabao ta? Baha coco y e tin su clientela. For di Noord pa Baby Beach, Kenny ta pasa baha y laga coco pa sea hendenan particular como comerciante. Y esaki ta su storia.
Su secreto
El a comenta cu ta Dios a dun’e e don pa subi mata. No ta tur hende por subi mata. E por mustra flaco, pero e tin hopi forsa. Pa por subi e mata, ta uno. Ora bo yega na halto, si bo subi e mata, ya bo ta cansa. Ta con bo ta haci baha e coconan. Kenny mes tin cinco aña haciendo e trabao aki.
Bahamento di coco
Tur cos ta depende cuanto pedido e haya, e ta baha coco, pasobra e ta tuma ordo. Y tur esaki el a siña for di defunto Ski. Riba un dia el a bay cu Ski pa baha coco. El a subi bay laira y e tabata benta e coconan pa Kenny.
Kenny mes tin bastante cliente. Hendenan cu ta riba caminda, ta par’e y pidi’e. Su coconan e ta bendenan pa 2 florin, contrario cu otro hendenan.
E ta bay tur caminda pa baha coco. E ta sali for di Pos Abao, e ta bay zuid, por ta e ta yega banda di Madiki, e ta bay ariba, pasa Ponton. Djey e ta pasa yega Tanki Leendert, djey pasa Sero Patrishi, bay den Meiveld.
Den Paradera tambe e por haya algun coco y tin hende ta coopera bon bon cun’e.
E triki ta pa bo no mishi. Si bo mishi cu algo di hende, nan no ta coopera. Hendenan ta dun’e confiansa pa e drenta nan cura.
E por baha hopi coco pa dia. Normalmente e ta dal 70 coco. Tin biaha e ta coy for di Marriott pa aeropuerto. E ora e ta baha 70 coco.
Tin dia un cliente so e tin, pero ta pidi masha hopi coco. Hasta Hindunan a cuminsa pidi’e coco. Un ta keda bisa otro.
Yudansa
Kenny a yega di cay, por lo menos 3 biaha y yudansa el a yega di pidi na Sociale Zaken, pasobra nan no kier yud’e. A bis’e cu e ta coy coco. Kenny ta haci e trabao aki tur dia, pa e por logra biba. E ta hopi duro y ta su fe den Dios, ta yud’e pa sobrevivi tur dia. Aunke e ta biba bon y e ta come bon. E no ta molestia ningun hende. Polisnan mes ta pasa cumind’e y hasta algun di nan cumpra coco cerca dje. Kenny ta subi 20 pa 25 mata di coco pa dia.
Su trabao
For di un mata di coco por coy 120 coco. Por bin dos biaha bah’e. Kenny ta sali tempran for di su cas y ta yega mas of menos pa 6’or y mey di atardi. Y e turistanan ta consider’e como un show, pasobra no ta tur hende por subi un mata di coco y baha e coconan. Y hasta manera pa benta e coconan abao mester sa con pa haci’e, sino e coconan ta kibra.
Di hamber Kenneth Urbano Flanegien di 42 aña no lo muri. E ta traha duro tur dia pa baha e coconan for di den mata. Asina e ta sobrevivi diariamente y tin su clientenan.
Ta algo cu el a siña for di Ski, kende awe no tey mas.
Tipo di choller
Tin hende ta considera un hende riba bicicleta como un choller. Segun Kenny, choller bo no ta haya realmente riba caya, sino bo ta haya nan scondi ta huma.
Tin tres clase di choller. Bo ta haya e choller choller, bo ta haya esun barata y awo bo ta haya esun caro.
Pero bo no por considera Kenny como un choller, pasobra e ta traha pa su cen.
Tur hende por traha
Ya for di tempran e ta sali for di su cas, e ta dal buelta, pasobra e hendenan tin biaha tin su pedidonan. E no por cumpli cu tur pedido, asina ta e ta laga pa su siguiente dia.
E sa con e por traha su cen. E tin coriente na cas, pero e no tin awa si. Pesey el a bay pidi yudansa na Departamento di Asuntonan Social. Antes e tabata duel’e. Pero awo esey no ta e caso mas.
E ta comenta cu hendenan ta bin cu tur 10 dede na oro y garganta tur na cadena, ta firma pa haya onderstand. Y e cu ta traha tur dia, no por haya. E ta e unico persona cu ta core cu su bicicleta cu coco riba dje.
Un biaha el a haya un trabao pa piki coco, unda el a bay hiba te na Baby Beach. El a hiba 120 coco den dos buelta. Pueblo ta cu Kenny, pasobra nan sa cu e ta traha y no ta mishi cu nada di ningun hende.
