Kámara di Komersio i Industria a fasilitá e bishita di Embahada Hulandes na Panama despues ku Kámara di Komersio a realisá un bishita komersial di reino na Panama den novèmber 2018.
E meta di e bishita di Embahada Hulandes ta pa informá empresarionan tokante hasi negoshi ku Panama. Den koperashon ku Embahada Hulandes Kámara di Komersio a organisá un seshon grátis ku yama “Doing Business with Panama” pa empresarionan lokal ku interes den hasi negoshi ku Panama.
Ademas di e seshon aki tabata tin diferente enkuentronan individual di Embahada tokante otro áreanan ekonómiko, i tambe Kámara di Komersio a organisá un seshon di mesa rondó pa empresarionan lokal ku aktividatnan spesífiko den e sektor di logístika. Kámara di Komersio ta kontentu ku e ánimo di e empresarionan pa e hasimentu di negoshi i e oportunidatnan pafó di Kòrsou i ta enkurashá nan pa tene kuenta ku e oportunidatnan aki pa eksportashon i ampliashon retnan internashonal.
Durante di e seshon Embahada a lansa e mishon komersial pa Panama i Costa Rica ku lo tuma lugá entre 17-21 di mart 2019. E énfasis di e mishon komersial aki ta riba área Marítimo, Agro i Logístika. Si tin empresario ku ta interesá por tuma kontakto ku Kámara di Komersio via di [email protected] .
